რა უნდა ვიცოდეთ კორონავირუსის ახალ შტამზე, რომელიც ბრიტანეთში დაფიქსირდა

დიდ ბრიტანეთში კორონავირუსის ახალი შტამი გამოჩნდა, რომელიც შედარებით უფრო სწრაფად ვრცელდება. ეს სიახლე დამატებითი შიშის საფუძველია, ვინაიდან შესაძლოა, კოვიდ-19-ის პანდემია გაგრძელდეს ვაქცინაციის პარალელურადაც კი. ინფორმაციას CNBC ავრცელებს.
დღემდე მიმდინარეობს მონაცემების გაცვლა მეცნიერებსა და ინფექციური დაავადებების ექსპერტებს შორის. ისინი ერთად აგროვებენ ახალ ინფორმაციას ვირუსის ახალი შტამის შესახებ, სახელწოდებით SARS-CoV-2. მართალია, ახალი შტამი აშშ-ში ჯერ არ გავრცელებულა, თუმცა მეცნიერები ამბობენ, რომ ის შესაძლოა, მთელ მსოფლიოს შეუმჩნევლად მოედოს.
თუმცა, მიუხედავად იმისა, რომ ვირუსი უფრო ადვილად გადამდებია, არ არსებობს არანაირი მტკიცებულება იმის შესახებ, რომ ახალი შტამი პაციენტების სიკვდილიანობის რისკს ზრდის. ამერიკის დაავადებათა კონტროლის და პრევენციის ცენტრში ამბობენ, რომ ახალი კორონავირუსი მუტაციას რეგულარულად განიცდის, თუმცა ამ მუტაციების აბსოლუტური უმრავლესობა უმნიშვნელოა.
კორონავირუსის ახალი ვარიაციის აღმოჩენის შემდეგ, 40-ზე მეტმა ქვეყანამ, აშშ-ის ჩათვლით, გაერთიანებულ სამეფოსთან სატრანსპორტო კავშირი შეაჩერა. სიტუაციის უკეთ მართვისთვის კი საჭიროა, კოვიდ 19-ის ახალ შტამზე ცოტა მეტი გავიგოთ: მსოფლიო ჯანდაცვის ორგანიზაციის ინფორმაციით, 13 დეკემბერს ბრიტანეთში 1 108 მუტაციური შემთხვევა დადასტურდა. თუმცა საგულისხმოა, რომ ეს რიცხვი სავარაუდოდ, არარეპრეზენტატულია, ამიტომ მეცნიერები გეგმავენ დამატებითი ტესტების ჩატარებას იმის დასადგენად, თუ ვირუსის რომელი შტამით არის დაავადებული პაციენტი.
WHO-ს ვარაუდით, იქიდან გამომდინარე, რომ ოქტომბრიდან ნოემბრამდე მსოფლიოში კოვიდ-ინფიცირების რაოდენობა საგრძნობლად მზარდი იყო, არსებობს საფუძვლიანი ეჭვი, რომ ეს პროცესი სწორედ კოვიდის მუტაციურმა შტამმა გამოიწვია. ამასთან, ეს ახალი ვარიაცია 70%-ით უფრო მეტად გადამდებია, ვიდრე კოვიდ 19-ის თავდაპირველი შტამი. ჯანმო-ს განვითარებადი დაავადებების განყოფილების ხელმძღვანელმა, მარია ვან კერხოვემ განაცხადა, რომ გაერთიანებული სამეფოს ოფიციალური პირების შეფასებით, მუტაციამ გამოიწვია ვირუსის რეპროდუქციული სიჩქარის გაზრდა 1,1-დან 1,5-მდე, რაც ნიშნავს, რომ დაავადებით დაინფიცირებული თითოეული ადამიანი თავის მხრივ აავადებს კიდევ 1,5 ადამიანს. ამასთან, WHO-ში ცალსახად გამორიცხავენ კოვიდ-შემთხვევების ზრდას ადამიანების ქცევის, ან გაუფრთხილებლობის გამო.
საგულისხმოა, რომ დიდი ბრიტანეთის ოფიციალური პირები ატარებენ ეპიდემიოლოგიურ და ვირუსოლოგიურ გამოკვლევებს იმის დასადგენად, არის თუ არა ვირუსის ახალი ვარიანტი უფრო ინფექციური, იწვევს თუ არა ხალხის უფრო მძიმე ავადმყოფობას და უნდა ველოდოთ თუ არა ადამიანების ხელახლა დაინფიცირებას. კვლევები ტარდება იმის დასაზუსტებლადაც, თუ რა მასშტაბებზეა ახალი შტამი გავრცელებული. ხოლო იქ, სადაც ახალი მუტაცია გამოვლინდა, ბრიტანეთმა მე-4 დონის შეზღუდვები დააწესა, რაც ქვეყანაში ყველაზე მკაცრ რეგულაციებს გულისხმობს.
გარდა ამისა, WHO-ს ინფორმაციით, ლაბორატორიული კვლევები გრძელდება იმის დასადგენად, აქვს თუ არა ახალ ვირუსს განსხვავებული ბიოლოგიური თვისებები ან რამდენად მოსალოდნელია, მან ვაქცინის ეფექტურობა შეცვალოს. დღეისათვის ცნობილია, რომ მუტაცია ვლინდება ცილის ცვლილებებში, რომელსაც ვირუსი ადამიანის უჯრედების დასაინფიცირებლად იყენებს. ამასთან, როგორც BioNTech–ის აღმასრულებელმა დირექტორმა, უღურ შაჰინმა განაცხადა, ის დარწმუნებულია, რომ კომპანიის მიერ შემუშავებული ვაქცინა იმუშავებს კორონავირუსის ახალი შტამის საწინააღმდეგოდ, თუმცა შაჰინმა ისიც დასძინა, რომ 100%-იანი სიზუსტისთვის დამატებითი კვლევებია საჭირო.

www.bm.ge