დაავადებათა კონტროლის ეროვნული ცენტრის დირექტორი, ამირან გამყრელიძე პალიტრანიუსის ეთერში განმარტავს, რა პირობებით აღდგება ქვეყანაში ფრენები 1-ლი თებერვლიდან. ამირან გამყრელიძის თქმით, ქვეყანაში შემოსვლის მსურველმა უნდა წარადგინოს ბოლო 72 საათში ჩატარებული PCR ტესტი, რომლის პასუხი უარყოფითია. მისივე თქმით, ქვეყანაში შემოსვლის უფლება ასევე ექნებათ იმ ადამიანებს, რომლებსაც COVID-19-ის საწინააღმდეგო ვაქცინაცია აქვთ ჩატარებული.
“ერთ-ერთი პირობა იქნება, რომ საქართველოში ყველა შემომსვლელს უნდა ჰქონდეს PCR ტესტი გაკეთებული უარყოფითი პასუხით ბოლო 72 საათის განმავლობაში. ან თუ არ აქვს გაკეთებული, აეროპორტებში არის სიმძლავრე, ან ვინც ვაქცინირებულია უკვე”. – თქვა გამყრელიძემ.
ამირან გამყრელიძე კითხვას – შესაძლებელია თუ არა ჩამოსული ადამიანების საკარანტინო სივრცეებში განთავსება, პასუხობს, რომ “შესაძლებელია, მაგალითად ინგლისში ახალი შტამი რომ დაფიქსირდა, ინგლისისთვის ჩვენ შემოვიღეთ – ბოლო 2 კვირის განმავლობაში იქ ნამყოფი ადამიანი გადადის მაინც საკარანტინო სივრცეში”.
რეგულარული ფრენების აღდგენის შესახებ ეკონომიკის მინისტრმა ნათია თურნავამ 22 იანვარს საკოორდინაციო საბჭოს დასრულების შემდეგ განაცხადა. მისივე თქმით, “ეს არ ნიშნავს, რომ 2 თებერვლიდან ჩვენი ცა აივსება ავიახომალდებით”.
Loading ...