რა ეტაპები დარჩა MEGOBARI აქტს გასავლელი?

აშშ-ს წარმომადგენელთა პალატამ MEGOBARI აქტს მხარი დაუჭირა.

კანონპროექტის ამოქმედებამდე კიდევ რამდენიმე ეტაპია დარჩენილი. ეს ეტაპებია:

• აშშ-ს წარმომადგენელთა პალატაში MEGOBARI აქტის მიღების შემდეგ, ზუსტად იგივე კანონპროექტი სენატმაც უნდა მიიღოს. ამჟამად აშშ-ს სენატში კანონპროექტს უკვე გავლილი აქვს საგარეო კომიტეტი, რის შემდეგაც ის კენჭისყრის ეტაპზე გადავიდა. სენატში აქტზე დებატები და კენჭისყრა, სავარაუდოდ, მომდევნო კვირების განმავლობაში შედგება;
• თუკი ორივე პალატაში კანონპროექტის ზუსტად ერთსა და იმავე ვერსიას მიიღებენ, მაშინ MEGOBARI აქტი შემდეგ ეტაპზე გადავა, თუმცა თუკი წარმომადგენელთა პალატა ან სენატი საკუთარ ვერსიაში შესწორებას შეიტანს, ამ შემთხვევაში საჭირო გახდება, რომ შესწორებული ვერსია კონგრესის მეორე პალატამაც მიიღოს;
• წარმომადგენელთა პალატასა და სენატში MEGOBARI აქტის საერთო ვერსიის დამტკიცების შემდეგ მას აშშ-ს პრეზიდენტს გადაუგზავნიან. პრეზიდენტის მხრიდან ხელმოწერის შემთხვევაში, აქტი ძალაში შევა. თუ პრეზიდენტი არაფერს მოიმოქმედებს, მაშინ აქტი 10 დღეში ავტომატურად შევა ძალაში, თუკი კონგრესი ამ პერიოდში მუშაობას გააგრძელებს. ხოლო პრეზიდენტის მხრიდან აქტზე ვეტოს დადების შემთხვევაში, კონგრესს ორივე პალატაში ხმების ორი-მესამედი დასჭირდება ვეტოს დასაძლევად;

აქტი ამერიკის პრეზიდენტს ივანიშვილის რეჟიმის წევრების, მათი ხელშემწყობებისა და ოჯახის წევრებისთვის სანქციების დაწესებას ავალდებულებს.

ორპარტიულ აქტში დეკლარირებულია, რომ საქართველოს მოქმედი ხელისუფლება სულ უფრო ზრდის მტრულ დამოკიდებულებას ქვეყნის დამოუკიდებელი სამოქალაქო საზოგადოებისა და მისი მთავარი ევროატლანტიკური პარტნიორების მიმართ, ამავდროულად კი აძლიერებს კავშირებს რუსეთის ფედერაციასთან, ჩინეთის სახალხო რესპუბლიკასთან და სხვა ანტიდასავლურ ავტორიტარულ რეჟიმებთან.