რა განწყობები აქვთ მოსახლეობას წინასაარჩევნოდ მელექედურში

2021 წლის 2 ოქტომბერს, საქართველოს მასშტაბით თვითმმართველობის არჩევნები ჩატარდება. არჩევნებში რამდენიმე პარტია და დამოუკიდებელი კანდიდატი იბრძოლებს პირველობისთვის. წინასაარჩევნო პროცესის თანასწორ, სამართლიან და გამჭვირვალე გარემოში ჩატარება სასიცოცხლოდ მნიშვნელოვანია ქვეყნის დემოკრატიული განვითარებისთვის. ამგვარი დაპირება ქვეყნის ხელისუფლებამ საქართველოს პარტნიორ ქვეყნებს არაერთხელ მისცა.

ახალი ცვლილებებით, რომელიც საარჩევნო კოდექსში შევიდა, იკრძალება რომელიმე პოლიტიკური პარტიის, საარჩევნო სუბიექტის კანდიდატის მხარდასაჭერად ან საწინააღმდეგოდ წინასაარჩევნო აგიტაციისა და კამპანიის პროცესში ადმინისტრაციული რესურსების გამოყენება. გურიაში, წინა საარჩევნო პროცესი სხვა რეგიონების მსგავსად მიმდინარეობს – სხვადასხვა პოლიტიკური პარტია საარჩევნო კამპანიებს ატარებს, სადაც თავიანთ პოლიტიკურ ხედვას და პროგრამას საზოგადოებას წარუდგენენ. ოზურგეთის მუნიციპალიტეტის საკრებულოს ეყოლება 15 მაჟორიტარი დეპუტატი, აქედან 12 სოფლებიდან და 3 ქალაქ ოზურგეთიდან. პროპორციული სიით კი მათ 30 დეპუტატი დაემატება.

ოზურგეთის მუნიციპალიტეტის ერთ-ერთ სოფელში, მელექედურში წინასაარჩევნოდ მოსახლეობას გავესაუბრეთ. გამოკითხულთა უმრავლესობა არჩევნებზე წასვლას აპირებს. მათი პოზიციები და პოლიტიკური სიმპათიები მრავალფეროვანია.

მ.მელქაძე , ადგილობრივი მკვიდრი – ,,თვითმმართველობის არჩევნებზე წასვლა ძალიან აუცილებელია, ჩვენ ყველამ საკუთარი არჩევანი უნდა გავაკეთოთ და ეს ყველაფერი მიკერძოებული არ უნდა იყოს”.

კ.თავაძე, ადგილობრივი მკვიდრი – “საზოგადოების ამოცანაა, რომ პოლიტიკური გზა წარმატებისკენ წაიყვანოს და ის უსამართლობა დაასრულოს რაც დღევანდელ რეალობაში ხდება და რომელიც თითოეული ჩვენგანისთვის საფრთხის შემცველია. ვფიქრობ, მოქალაქეების აქტიურობა ამას წერტილს დაუსვამს. ეს ყველაფერი არა პარტიების, არამედ თითოეული მოქალაქის ხელშია”.

საქართველოში 2021 წლის 2 ოქტომბრის ადგილობრივი თვითმმართველობის არჩევნებამდე ორი დღე არის დარჩენილი, პოლიტიკური პარტიები კი ცდილობენ ეს ბოლო დღეები წინასაარჩევნო კამპანიისთვის მაქსიმალურად გამოიყენონ.