გურიაში, თებერვლის თვეში აბონენტების ნაწილს ბუნებრივი აირის საფასური მოსალოდნელზე მეტი ან ნაკლები დაერიცხათ. აღნიშნულთან დაკავშირებით, მოქალაქემ ”სოკარ ჯორჯია გაზს” მიმართა. როგორც აღმოჩნდა, თებერვალში დიდთოვლობის გამო, კომპანიის თანამშრომლების მიერ მრიცხველებიდან ჩვენების აღება ვერ მოხერხდა. ამიტომ კომპანიამ გასული წლის თებერვლის თვის ჩვენებებით ისარგებლა და აღნიშნულ აბონენტებს წელს ბუნებრივი აირის ის საფასური მიუვიდათ, რამდენიც გასული წლის თებერვალში მოიხმარეს.
”ამჟამად მოსული დავალიანების გადახდა ამ თვეში სავალდებულო არ არის, არავის შეუწყდება ბუნებრივი აირის მიწოდება, ვინც გადახდას ვერ მოახერხებს. მარტის თვისთვის დაზუსტდება თებერვლის და მარტის ჩვენებები და მარტში ორივე თვის გადასახადი ერთად დაირიცხება. თუ ახლა ვინმე გადაიხდის ამჟამად დარიცხულ დავალიანებას, თებერვლის ზუსტი ჩვენების მიხედვით, შემდგომში ან ბალანსში დაუჯდება ან მარტის თვეში დამატებით გადაიხდის. თუ ვინმე ფიქრობს, რომ მარტის თვეში ორი თვის გადასახადის ერთად გადახდა გაუჭირდება, შეუძლიათ დაგვირეკონ ცხელ ხაზზე (16114), თვითონ გვიკარნახონ მრიცხველზე არსებული მაჩვენებელი და ზუსტად ვეტყვით, რამდენი აქვთ თებერვლის თვეში გადასახადი.” – განაცხადეს ”სოკარ ჯორჯია გაზის” ცხელ ხაზზე.
Loading ...