რატომ იხურება ბაქო-თბილისი-ყარსის რკინიგზა

15 მაისის 00:00 საათიდან ბაქო-თბილისი-ყარსის რკინიგზის საქართველოს მონაკვეთი იხურება.
როგორც BMG -ის „საქართველოს რკინიგზაში“ განუმარტეს, შეტყობინება ქართულმა მხარემ სარკინიგზო ხაზის ,,მარაბდა კარწახის” მონაკვეთის მშენებელი კონტრაქტორისგან უკვე მიიღო.
„კომპანიის ,,დსს აზერბაიჯანის რკინიგზების ფილიალი საქართველოში” ოფიციალური წერილის თანახმად, 15 მაისის 00:00 საათიდან იზღუდება სარკინიგზო მიმოსვლა. მატარებელთა მოძრაობის შეწყვეტის მიზეზი არსებულ მონაკვეთზე გენერალური კონტრაქტორის მიერ მშენებლობის ტემპების დაჩქარება და შემჭიდროებულ ვადებში პროექტის დასრულებაა“, – განუცხადეს BMG -ის „საქართველოს რკინიგზაში“.
რა ვადით დაიხურა „ბაქო-თბილისი- ყარსის“ რკინიგზა უცნობია.
მიმდინარე წელს რკინიგზის მშენებლობაში დამატებით 100 მლნ დოლარის ინვესტიციის ჩადება დააანონსა ჯერ კიდევ გასული წლის დეკემბერში დაანონსდა.
„ჩვენს მეგობარ აზერბაიჯანთან უკვე მივაღწიეთ შეთანხმებას და 100 მილიონი დოლარი დამატებით გამოიყო ამ პროექტის დასასრულებლად და სამუშაოები აქტიურად მიმდინარეობს. 86% არის დასრულებული და 2024 წელს აღნიშნული პროექტი საზეიმოდ გაიხსნება,”- განაცხადა ირაკლი ღარიბაშვილმა.
სარკინიგზო ხაზის მშენებლობა 2008 წელს დაიწყო. რკინიგზა ოფიციალურად ექსპლუატაციაში არ არის შესული, სატესტო რეჟიმში კი, გადაზიდვები 2017 წლის 30 ოქტომბრიდან მიმდინარეობდა.  საქართველოს მონაკვეთზე სამუშაოების დაახლოებით 86%-ია შესრულებული.