„გიყვართ წვიმის შემდეგ მიწიდან ამოვარდნილი სასიამოვნო სუნი? ბევრმა არ იცის, რომ ამ სუნს თავისი სახელი აქვს – პეტრიკორი”,- ამის შესახებ სოციალურ ქსელში მიხეილ ჭაბუკაშვილი წერს.
„გიყვართ წვიმის შემდეგ მიწიდან ამოვარდნილი სასიამოვნო სუნი? ამ პოსტში გეტყვით, რა არის ის სინამდვილეში!
ბევრმა არ იცის, რომ ამ სუნს თავისი სახელი აქვს — პეტრიკორი. მეცნიერებმა დაადგინეს, რომ ის, რაც ჩვენ ასე გვაჯადოებს, სინამდვილეში მიკროორგანიზმების სასიცოცხლო ციკლის ნაწილია.
როგორ წარმოიქმნება?
მიწაში ბინადარი ბაქტერიები (სტრეპტომიცეტები) გამოყოფენ ნივთიერება გეოსმინს. როდესაც წვიმის წვეთები მშრალ მიწას ეცემა, ეს ნივთიერება აეროზოლის სახით ჰაერში იფრქვევა და ჩვენს რეცეპტორებამდე აღწევს.
აღმოჩნდა, რომ ეს სუნი მხოლოდ ჩვენ კი არა, ნიადაგის ციცქნა ბინადრებს — ბოლოფეხიანებსაც იზიდავს.
ბაქტერიები ამ მწერებს სუნით იტყუებენ
მწერები ჭამენ ბაქტერიებს. სანაცვლოდ, ისინი თავიანთი სხეულით თუ ფეკალიებით ბაქტერიების სპორებს შორ მანძილზე ავრცელებენ.
სტრეპტომიცეტები მრავალი თვალსაზრისით სოკოების მსგავსად მოქმედებენ. ისინი ძალიან ჰგვანან სოკოს შემადგენელ ძაფებს, სახელად ჰიფებს; როდესაც ისინი გამრავლებისთვის მზად არიან, წარმოქმნიან სპორებს, რომელსაც შეუძლია, ახლად დაბადებული ბაქტერიები რაც შეიძლება ფართოდ გაავრცელოს.
გამოდის, რომ „წვიმის სუნი“ ბაქტერიების „სარეკლამო კამპანიაა“ გადასარჩენად და გასამრავლებლად!
შემდეგ ჯერზე, როცა წვიმის სუნით დატკბებით, გაიხსენეთ, რომ ეს ერთი პატარა, მაგრამ გენიალური ეკოსისტემის მუშაობის შედეგია”,- წერს ჭაბუკაშვილი.
Loading ...