''რატომ გავიწყდებათ ნასაკირალში მცხოვრები მესხები?'' – ოზურგეთის მერიას ნასაკირალელი მესხი საყვედურს საჯაროდ ეუბნება

ნასაკირალში მცხოვრები მესხი ქალბატონი საიდა ხოსაძე სოციალურ ქსელში სტატუსს წერს და ოზურგეთის მუნიციპალიტეტის მერს მიმართავს. საიდა ხოსაძის თქმით, გუშინ, როცა დაბა ნასაკირალში სოციალურად დაუცველ და მრავალშვილიან ოჯახებს ოზურგეთის მერიამ პროდუქტები მიუტანა, ამ სიაში მესხების უბანში მცხოვრები მრავალშვილიანი და სოციალურად დაუცველი დედები არ აღმოჩნდნენ. 

”მოგმართავთ თქვენ. ოზურგეთის მუნიციპალიტეტს, მერს, და ყველა იმ პიროვნებებს, ვინც  ამ საქმეში ხართ ჩარეული, რატომ ყოველთვის გავიწყდებათ ნასაკირალში მცხოვრები მესხები? რა, მესხებში მრავალშვილიანი ოჯახი არ შეიძლება რომ იყოს? თუ არ თვლით მესხ დედას მრავალშვილიანად? მეც ხომ 5 შვილი მყავს. აი აქ მეზობელს 4 შვილი ჰყავს.  ისეთი მეზობელიც მყავს, საჭმელიც კი არა აქვს. ეს გამგეობამ იცის? არჩევნების დროს გახსენდებათ მესხები. მთელ გამგეობას ნუთუ არ გაქვთ სია მრავალშვილიანების და სოციალურად დაუცველების? აბა, ტელეფონის ნომერი რად მთხოვეთ პროდუქტი უნდა დაგირიგოთო? ალბათ სიას აგროვებთ პროდუქტს იღებთ და მერე არჩევთ, ვის მივცეთ, ვის -არა. დანარჩენი პროდუქტი სად მიდის? აბა რა ვიფიქრო ?  .2აქ ჩვენთან ვართ მრავალ შვილიანი დედა. და ერთი პირველ რაიონში .3 ,,მესხი” დედას არ ეყო ეგ პროდუქტი.? ძალიან კარგადაც იცით ვინ ვარ მე და როგორ ვცხოვრობ…” – წერს საიდა ხოსაძე სოციალურ ქსელში.

ნასაკირალის მაჟორიტარი დეპუტატის ბესო ქათამაძის თქმით, აღნიშნულ პროცესში თავად ჩართული არ ყოფილა: ”სამარცხვინო იყო, რაც ჩაიდინეს. ჯერ ერთი, მესხების უბანში მცხოვრები ოჯახები საერთოდ გამოტოვეს, მერე კი ვისაც მიუტანეს, ფოტოები გადააღებინეს პროდუქტებთან და სოციალურ ქსელში დადეს. ამას სახელი არ ჰქვია. ფაქტიურად საარჩევნო კამპანია აქვთ დაწყებული. რაც შეეხება მესხებს, მეც ძალიან ვწუხვარ მაგ საკითხთან დაკავშირებით, ახლა ვცდილობ რაღაცების გარკვევას და ვეცდები ჩემი კონტაქტებით მოვახერხო და მესხი დედები პროდუქტების გარეშე არ დარჩნენ” 

დაბა ნასაკირალის მაჟორიტარის ოთარ ადაძის თქმით, ამ ეტაპზე პროდუქტი მხოლოდ იმ ოჯახებს ეკუთვნოდათ, რომელთაც გარდა მრავალშვილიანის სტატუსისა, 2 წელს ქვევით ბავშვი ჰყავთ. ”ეს პროდუქტის დარიგების პირველი ეტაპი იყო. 2 წლამდე ბავშვი მესხების უბანში არცერთ მრავალშვილიან ოჯახს არ ჰყავს. მომდევნო ეტაპზე კი უკვე დანარჩენ ოჯახებს მოვიცავთ” – განაცხადა რწმუნებულმა.