რას წერს იტალიური მედია ქართველი კანონიერი ქურდის დაკავების შესახებ

2025 წლის 22 მაისს, რომის “ჩამპინოს” აეროპორტში იტალიის სპეცრაზმმა, საჰაერო პოლიციამ და სასაზღვრო სამსახურმა, საერთაშორისო პოლიციურ თანამშრომლობასთან კოორდინაციით, დააკავეს 43 წლის მინდია გორაძე — ბათუმში დაბადებული საქართველოს მოქალაქე, კრიმინალურ წრეებში ცნობილი როგორც “ლავასოღლი ბათუმელი”.

მისი დაკავება მოხდა გერმანული ნომრებით მოძრავი ავტომობილით აეროპორტში ჩამოსვლის შემდეგ. სამართალდამცველებმა ის გადაიყვანეს რომის ერთ-ერთ ყველაზე ცნობილ საპატიმროში – „რეჯინა ჩელი“ (Regina Coeli), რომელსაც ხშირად მოიხსენიებენ როგორც “ზეციური დედოფალი”. ოფიციალურად, გორაძის დაკავების მიზეზი ინტერპოლის ბაზაში არსებული ორი “წითელი ცნობაა”, რომლებიც საქართველომ და უკრაინამ გამოაცხადეს. თუმცა, იტალიაში ჩატარებული ოპერაცია ძირითადად უკავშირდება უკრაინის მიერ წაყენებულ ბრალდებებს – კონკრეტოდ, ოდესის ოლქში რეკეტს და კრიმინალურ სამყაროში სტატუსის მოპოვებასთან დაკავშირებულ ქმედებებს.

უკრაინაში გორაძეს 2023 წელს წარედგინა ეჭვმიტანილის სტატუსი, რის შემდეგაც დაუსწრებლად გამოაცხადეს ძებნა. 2025 წლის თებერვალში კი ოდესის პრიმორსკის რაიონულმა სასამართლომ მიიღო გადაწყვეტილება, რომ მის წინააღმდეგ სპეციალური (დაუსწრებელი) სასამართლო პროცესის ფორმატში წარმოებულიყო მართლმსაჯულება. მას ბრალი ედება დანაშაულებრივი დაჯგუფების ორგანიზებაში, რეკეტში და კრიმინალურ შეკრებაში მონაწილეობაში.

ერთ-ერთი ვერსიით, სპეცოპერაცია გადამწყვეტ ფაზაში მას შემდეგ შევიდა, რაც გავრცელდა ინფორმაცია მისი იტალიაში ჩასვლის შესახებ. რუსულმა გამოცემამ PrimeCrime მაისის მეორე ნახევარში გაავრცელა ცნობები, რომ იტალიაში ჩატარდა კრიმინალური შეკრება („сходка“), რომელშიც მონაწილეობა მიიღო 30-მდე “კანონიერმა ქურდმა”. შეხვედრა ორგანიზებული იყო სოხუმის კლანის ლიდერების მიერ და მის ერთ-ერთ მთავარ თემად სახელდებოდა გადაწყვეტილების მიღება მერაბ ჯანგველაძის – იგივე “მერაბ სოხუმელის” – უმცროსი ძმის მკვლელობასთან დაკავშირებულ პირებზე.