რას ნიშნავს, როდესაც კოვიდი მაღალი ტემპერატურით იწყება – თერაპევტის განმარტება

თერაპევტი ლიზა გოდერძიშვილი კოვიდ-19 -ით ინფიცირებულ პაციენტებში საწყის სიმპტომად მაღალი ტემპერატურის გამოვლენის შესახებ საუბრობს და აღნიშნავს, რომ ეს ორგანიზმის მძლავრ რეაქციაზე მიანიშნებს. 

ლიზა გოდერძიშვილი განმარტავს, რომ თუ ვირუსისთვის დამახასიათებელი სიმპტომები გაივლის და მხოლოდ 37.5-მდე ტემპერატურა დარჩება, ეს საგანგაშო არ არის. 

„როდესაც კოვიდ-19 პირდაპირ იწყება მაღალი ცხელებით, ეს ნიშნავს იმას, რომ თავიდანვე აქვს ორგანიზმს საკმაოდ მძლავრი და შედეგიანი რეაქცია. ეს დასკვნა არსებულ ვითარებაზე დაკვირვებით გამოგვაქვს. არ განვითარებულა ცხელება, არ განვითარებულა სხვა გართულება, სუნთქავს ადამიანი კარგად, არ აქვს სუნთვის უკმარისობა, შესაძლოა, იყოს ხველა, როგორც ზედა სასუნთქი გზების დაზიანების ნიშანი. მხოლოდ ზედა სასუნთქი გზების დაზიანებაც კი საკმაოდ შეტევითი და მძლავრი ხველით მიდის. თუ შემდეგ ამ ყველაფერმა გაიარა და დატოვა ტემპერატურა 37,5-მდე, ეს არ არის საგანგაშო ნიშნული. ეს ზოგჯერ ნორმადაც განიხილება. თუ ადამიანს მანამდე არ ჰქონდა მსგავსი ტემპერატურა, ეს განიხილება ინფექციის კუდად. კუდს ვეძახით ამას. ჩვეულებრივი ამბავია ეს, სხვა რესპირატორულ ინფექციებსაც შეიძლება ჰქონდეს. კორონავირუსული ინფექციების დროს საკმაოდ ხშირად არსებობს.“ – ამბობს გოდერძიშვილი. 

ლიზა გოდერძიშვილის თქმით, კოვიდი ძალიან ბევრ ნარჩენ მოვლენას ტოვებს, რასაც პაციენტის მხრიდან ყურადღების მიქცევა სჭირდება. 

„ამ დროს არამხოლოდ ტემპერატურის მატებაა, ხველაც დიდხანს რჩება, არის საერთო სისუსტეც. ეს არის ინფექციის ნარჩენი მოვლენები. ამ პერიოდში ყოჩაღი დამოკიდებულება მართებს პაციენტს, კუნთების გააქტიურება, მეტი მოძრაობა, მეტი სითხის მიღება, ცილოვანი კვება, რომ რეგენერაციას და რეაბილიტაციას შეუწყოს ხელი. ორგანიზმმა ძალიან დიდი ძალისხმევა დახარჯა ინფექციასთან ბრძოლაში.

ბრონქიტის გამწვავების ერთ-ერთ მაპროვოცირებელ მიზეზებს შორის მოიაზრება ე.წ. ხახის უკანა ჩამონაწვეთი, რომელიც სინუსებიდან ჩამოდის და ხველის ერთ-ერთი უტყუარი მიზეზია. თუ ბროქნიტის წარმოშობას არ აქვს სხვა მიზეზი, მწეველობა, უკვე არსებული ქრონიკული ბრონქიტი, ამ შემთხვევაში გამწვავება ნაკლებად სავარაუდოა. ორგანიზმს აქვს თავისი საკმაოდ მძლავრი ბარიერები, რომ გარეთა სასუნთქი გზებიდან ინფექცია არ შეუშვას შიდა სასუნთქ გზებში,”– აღნიშნა ლიზა გოდერძიშვილმა.

www.report.ge