ოზურგეთის მეოთხე საჯარო სკოლაში ტარიელ კალანდაძის დირექტორობის კანდიდატად დარეგისტრირებაზე უარის თქმას სკოლის პედაგოგები და მშობლები აპროტესტებენ. მათი განცხადებით, ინფორმაცია, რომლის მიხედვითაც ტარიელ კალანდაძემ გასაუბრება ვერ გაიარა და დირექტორის არჩევნებში მონაწილეობაზე უარი ეთქვა, მათთვის შოკისმომგვრელია.
–წარმოუდგენელია, ტარიელ კალანდაძე 38 წელია ამ სკოლაში მუშაობს, საუკეთესო დირექტორი, მენეჯერი და პედაგოგია. მისი წყალობით გახდა სკოლა ისეთი წარმატებული, როგორიც დღესაა. მოვიდეს ვინმე და აგვიხსნას, რატომ ეთქვა ჩვენს დირექტორს უარი ამ პოზიციაზე – აცხადებენ სკოლის პედაგოგები.
გამოკითხული მშობლების განცხადებით, თუ ტარიელ კალანდაძე სკოლის დირექტორი არ იქნება, შვილებს სხვა სკოლებში გადაყვანენ.
– სწორედ იმიტომ მოვიყვანეთ ჩვენი ბავშვები ამ სკოლაში, რომ ბატონი ტარიელი იყო დირექტორი. ამ გადაწყვეტილებას პოლიტიკურად მივიჩნევთ და ვითხოვთ ახსნა–განმარტებას – აცხადებს ერთ–ერთი მშობელი.
თავად ტარიელ კალანდაძის განცხადებით, მისთვის უცნობია მიზეზი, თუ რატომ არ მიეცა არჩევნებში მონაწილეობის მიღების შესაძლებლობა. როგორც კალანდაძე ამბობს, მისთვის აღნიშნული გადაწყვეტილება მოულოდნელი იყო.
საზოგადოების ნაწილი თვლის, რომ კალანდაძისთვის უარის თქმის მიზეზი მისი პროევროპული პოზიცია და პოლიტიკურ პროცესებში პასიურობა გახდა. ამასთან დაკავშირებით ტარიელ კალანდაძე ამბობს, რომ პოლიტიკურად აქტიური მართლაც არასდროს ყოფილა.
– პოლიტიკურად აქტიური არასდროს ვყოფილვარ, რაც შეეხება ევროინტეგრაციასთან დაკავშირებულ ჩემს მოსაზრებებს, ნამდვილად ღიად დამიფიქსირებია, რომ მე მსურს ევროპა. მგონი ამაში საზოგადოების ყველა წევრი ვთანხმდებით და ამაში არაფერი ახალი არ არის. – განაცხადა ტარიელ კალანდაძემ.
შეგახსენებთ, რომ ცნობილი გახდა ფაქტი, რომლის მიხედვითაც ტარიელ კალანდაძეს განათლების სამინისტრომ დირექტორობის არჩევნებში მონაწილეობაზე უარი უთხრა, რადგან უწყენის ინფორმაციით, ტესტირების ჩაბარების შემდეგ მან მეორე ეტაპი – გასაუბრება ვერ გაიარა. მეოთხე საჯარო სკოლას სამინისტრომ დირექტორის პოზიციაზე ხათუნა ლომთაძე წარუდგინა.
Loading ...
