კომპანიების საინფორმაციო სისტემა BIA-ს ინფორმაციით, 2020 წელს ქვეყანაში დროებით შეჩერებული კომპანიების რაოდენობა 78%-ით გაიზარდა და მან 2 814 შეადგინა. ორგანიზაციის შეფასებით, კერძო სექტორისთვის საქმიანობის შეჩერების კუთხით 2021 წელი 2020 წელთან შედარებით უფრო მძიმე იქნება.
“დროებით შეჩერებული კომპანიების რაოდენობა 2021 წლის 1 იანვრიდან დღემდე, 4.5 თვის განახლების მაჩვენებლის მიხედვით უკვე 2 455 არის. შესაბამისად, შეგვიძლია ვივარაუდოთ, რომ წლის ბოლოს 2020 წლის მაჩვენებელს როდესაც შევადარებთ, საგრძნობლად გაზრდილი ციფრი გვექნება,” – ნათქვამია ორგანიზაციის მიერ გამოქვეყნებულ ინფორმაციაში.
BIA-ს სტატისტიკის მიხედვით, შეჩერებული კომპანიების განაწილება ზომის ჭრილში ასეთია:
მცირე ზომის კომპანია – 85%;
საშუალო ზომის კომპანია – 13.5%;
მსხვილი ზომის კომპანია – 1.5%;
2020 წელს შეჩერებული კომპანიების დარგების ანალიზის მიხედვით გამოვლინდა შემდეგი TOP-ხუთი საქმიანობის კატეგორია:
რესტორნები და ბარები;
ტურიზმი (ტურისტული მომსახურებები და სხვადასხვა ტიპის სასტუმროები);
სილამაზე და სპორტი;
უძრავი ქონების მართვა;
საოფისე და საოჯახო საქონელი;
“პანდემიის პროცესების გავლენა 1 წლის შემდეგ უფრო მეტად შეიმჩნევა მცირე ზომის კომპანიებზე; ამჟამად უფრო და უფრო იზრდება მცირე კომპანიების რიცხვი, რომლებიც აჩერებენ ბიზნესს დროებით ან სრულად. ფაქტობრივად, გადარჩევა მოხდა; არის კომპანიები, რომლებმაც მოკლე დროში მოახერხეს, ადაპტირდნენ დღევანდელ გარემოში, შეცვალეს ბიზნესის სახე ან მომსახურების ფორმა და აეწყვნენ დისტანციურად ბიზნესის მართვის პრინციპებზე და არიან კომპანიები, რომლებმაც დღევანდელ ბიზნესგარემოში ოპერირება ვეღარ შეძლეს”, – ნათქვამია BIA-ს ინფორმაციაში.
2020 წლის 1 მარტიდან 2021 წლის 1 აპრილის ჩათვლით, ბიას პლატფორმაზე განახლდა 33,870 კომპანია, საიდანაც
1650 (კომპანიათა 5%) სრულად შეჩერებული კომპანიაა, 4152 კი (კომპანიათა 12%) – დროებით შეჩერებული კომპანია.
www.bm.ge
Loading ...