რამდენი ბავშვი შეიძლება იყოს ერთ კლასში და რა შემთხვევაში უწევს მოსწავლეს გაცდენების გამო გამოცდის ჩაბარება-აქტუალური კითხვები

გამონაკლისი დაიშვება საქართველოს განათლებისა და მეცნიერების სამინისტროსთან წერილობითი შეთანხმებით. ასეთ შემთხვევაში მოსწავლეთა მაქსიმალური რაოდენობა არ უნდა აღემატებოდეს 29-ს.

– რომელ საგნებში შეიძლება კლასის გაყოფა და მოსწავლეთა რა რაოდენობაზე?

– კლასის გაყოფა დასაშვებია შემდეგ საგნებში: ქართულ ენასა და ლიტერატურაში, უცხოურ ენებში და ინფორმაციულ და საკომუნიკაციო ტექნოლოგიებში, თუ სკოლას აქვს შესაბამისი ფინანსური შესაძლებლობა. ამასთან, ქართულ ენასა და ლიტერატურაში კლასის გაყოფა დასაშვებია იმ შემთხვევაში, თუ კლასში მოსწავლეთა რაოდენობა აღემატება 25-ს; ხოლო უცხოურ ენებში იმ შემთხვევაში, თუ კლასში მოსწავლეთა რაოდენობა არის 18 ან მეტი.

– რა შემთხვევაში იქმნება კლას-კომპლექტი?(სხვადასხვა კლასის მოსწავლეების გაერთიანება ერთ კლასში)

– მცირეკონტინგენტიან სკოლებში დასაშვებია კლასკომპლექტების შექმნა. კლასკომპლექტში მოსწავლეთა რაოდენობა არ უნდა აღემატებოდეს 10-ს. კლას-კომპლექტის შექმნის შემთხვევაში რეკომენდებულია ის შეიქმნას ერთი საფეხურის ფარგლებში და ერთ კლას-კომპლექტში არ გაერთიანდეს ორ კლასზე მეტი. I-IV კლასები შეიძლება დაკომპლექტდეს სხვადასხვა პრინციპით (მაგ.: I-II და III-IV პრინციპით, ან I-III და II-IV პრინციპით). სპორტის, მუსიკის, სახვითი და გამოყენებითი ხელოვნების გაკვეთილებზე შესაძლებელია გაერთიანდეს რამდენიმე კლასი (მაგ. I, II და III; IV,V და VI; VII, VIII და IX და ა.შ.).

– სავალდებულოა თუ არა დამრიგებელი ასწავლიდეს კლასს?

– ეროვნული სასწავლო გეგმის მიხედვით, საჯარო სკოლაში ყველა კლასს უნდა ჰყავდეს დამრიგებელი. დამრიგებელი უნდა იყოს იმავე სკოლის პედაგოგი. ანუ სავალდებულო არ არის დამრიგებელი უშუალოდ ასწავლიდეს კლასს.

– აქვს თუ არა კერძო სკოლას უფლება განსხვავებული სქემით ასწავლოს საგნები, მათ შორის უცხოური ენა?

– კერძო სკოლები უფლებამოსილნი არიან, ეროვნული სასწავლო გეგმით გათვალისწინებული ნებისმიერი საგანი ასწავლონ ეროვნული სასწავლო გეგმით დადგენილისგან განსხვავებული სქემით. ამავე დროს, კერძო სკოლებზე არ ვრცელდება ეროვნული სასწავლო გეგმის მე-40 მუხლის მე-4 პუნქტით დათქმული მოთხოვნა უცხოური ენების სწავლების სქემასთან დაკავშირებით. შესაბამისად, მეორე უცხოური ენის ნებისმიერი კლასიდან სწავლების დაწყებისთვის კერძო სკოლები საქართველოს განათლებისა და მეცნიერების სამინისტროს ნებართვას არ საჭიროებენ.

– აქვს თუ არა საჯარო სკოლას უფლება მეორე უცხოური ენის სწავლება დაიწყოს V კლასამდე?

– სკოლა უფლებამოსილია, გამონაკლისის სახით, სამინისტროსთან შეთანხმებით, მეორე უცხოური ენის სწავლება დაიწყოს ნებისმიერი კლასიდან. ამასთანავე, სკოლამ სამინისტროს უნდა წარუდგინოს სკოლის პედაგოგიური საბჭოსა და სამეურვეო საბჭოს სხდომების ოქმების გადაწყვეტილებები, მშობელთა განცხადება, საათობრივი ბადე, სასწავლო რესურსების ჩამონათვალი, ინფორმაცია მატერიალური და ადამიანური რესურსების შესახებ.

– რა შემთხვევაში ითვლება კლასი დაძლეულად?

– კლასი დაძლეულად ჩაითვლება, თუ მოსწავლის თითოეული საგნის წლიური ქულა (დამრგვალების შემდეგ) არის 5.0 ან მეტი და მოსწავლეს მიღებული აქვს ჩათვლა ეროვნული სასწავლო გეგმით განსაზღვრულ რიგ საგნებში (სპორტი, საგზაო ნიშნები და მოძრაობის უსაფრთხოება), რაც აძლევს მას მომდევნო კლასში გადასვლის უფლებას.

– რა შემთხვევაში ინიშნება სემესტრული გამოცდა?

– სემესტრული გამოცდა ინიშნება მხოლოდ იმ შემთხვევაში, თუ მოსწავლე თვლის, რომ მას უფრო მაღალი შეფასება ეკუთვნის. ამ შემთხვევაში, მოსწავლის მშობელი/კანონიერი წარმომადგენელი წერილობით მიმართავს სკოლის დირექტორს. დირექტორი განიხილავს საკითხს და იღებს გადაწყვეტილებას მოსწავლის სემესტრულ გამოცდაზე დაშვება-არდაშვების შესახებ. დაშვებაზე უარის შემთხვევაში, გადაწყვეტილება უნდა იყოს დასაბუთებული.
მოსწავლის სემესტრულ გამოცდაზე დაშვების შემთხვევაში, სკოლამ უნდა მიიღოს შესაბამისი ზომები სემესტრული გამოცდის ობიექტურად და მიუკერძოებლად ჩატარების უზრუნველყოფის მიზნით.
სემესტრულ გამოცდაზე გასული მოსწავლის საგნის სემესტრული ქულა გამოითვლება შემდეგი წესით: სემესტრული გამოცდის ქულა ემატება საგნის სემესტრულ ქულას და ჯამი იყოფა ორზე. სემესტრული გამოცდა ინიშნება სემესტრის დასრულებიდან არაუგვიანეს 2 კვირის ვადაში.

– რა შემთხვევაში ინიშნება საშემოდგომო გამოცდა?

– იმ შემთხვევაში, თუ მოსწავლის საგნის წლიური ქულა არის 5-ზე ნაკლები, სკოლა ვალდებულია მოსწავლეს დაუნიშნოს საშემოდგომო გამოცდა ამ საგანში. საშემოდგომო გამოცდის ჩატარების წესი და პროცედურა განისაზღვრება სასკოლო სასწავლო გეგმით. საშემოდგომო გამოცდა უნდა ჩატარდეს სასწავლო წლის დასრულებიდან არაუადრეს ორი კვირისა და სასწავლო წლის დაწყებამდე მინიმუმ ერთი კვირით ადრე. საშემოდგომო გამოცდამდე მოსწავლეს უნდა მიეცეს არანაკლებ 2 კვირის ვადა მომზადებისთვის. სკოლა ვალდებულია გაუწიოს კონსულტაციები მოსწავლეს იმ საგანში/საგნებში, რომლებშიც მას დაენიშნა აღნიშნული ტიპის გამოცდა. მოსწავლე საგნის/საგნების წლიურ შეფასებას იღებს საშემოდგომო გამოცდის საფუძველზე (საშემოდგომო გამოცდის ქულა ხდება საგნის წლიური ქულა).

– რა შემთხვევაში ინიშნება წლიური გამოცდა?

– წლიური გამოცდის დანიშვნა/არდანიშვნის საკითხს წყვეტს სკოლა. აღნიშნული ასახული უნდა იყოს სასკოლო სასწავლო გეგმაში. სკოლას უფლება აქვს ერთი აკადემიური წლის განმავლობაში კლასს დაუნიშნოს გამოცდა არაუმეტეს ორ საგანში. ამავე დროს, ერთსა და იმავე საგანში გამოცდებს შორის უნდა იყოს ორწლიანი შუალედი მაინც (მაგ. თუ სკოლამ მე-7 კლასში დანიშნა წლიური გამოცდა ინგლისურ ენაში, მომდევნო ორი წლის განმავლობაში ამ საგანში ვეღარ დანიშნავს წლიურ გამოცდას). წლიური გამოცდა შეიძლება დაინიშნოს მხოლოდ საბაზო და/ან საშუალო საფეხურზე. თუ სკოლას სურს საგნის წლიური გამოცდის დანიშვნა, მან სასწავლო წლის დაწყებამდე უნდა განსაზღვროს, რომელ კლასში/კლასებში და რომელ საგანში/საგნებში ჩაატარებს ამ გამოცდას და ექნება თუ არა ამ გამოცდაზე მიღებულ ქულას გავლენა საგნის წლიურ ქულაზე. თუ სკოლა ჩაატარებს წლიურ გამოცდას, იგი ვალდებულია გამოცდაზე შინაარსიანი, კონტექსტუალიზებული, კომპლექსური დავალებები შესთავაზოს მოსწავლეებს (მაგალითად: თხზულება, მოხსენება, რეფერატი, პროექტი, ამოცანის ამოხსნა, სახვითი და გამოყენებითი ხელოვნების ნიმუში და სხვ.). თუ სასკოლო სასწავლო გეგმით განსაზღვრულია, რომ წლიური გამოცდის ქულას გავლენა აქვს საგნის წლიურ ქულაზე, საგნის წლიური ქულის გამოთვლისას წლიური გამოცდის ქულა ემატება საგნის სემესტრულ ქულებს და ჯამი იყოფა სამზე.

– რა შემთხვევაში უწევს მოსწავლეს გაცდენების გამო ექსტერნატის გამოცდის ჩაბარება?
– თუ საბაზო-საშუალო საფეხურებზე მოსწავლემ სასწავლო წლის განმავლობაში გააცდინა კონკრეტული საგნისთვის წლის მანძილზე დათმობილი საათების 30% და მეტი, მოსწავლე ფასდება მხოლოდ ექსტერნატის გამოცდის ჩაბარების საფუძველზე.

– რამდენ კლასს მოიცავს სავალდებულო სწავლება?

– სავალდებულოა დაწყებითი და საბაზო განათლება, რაც მოიცავს I-IX კლასებს.
განათლებისა და მეცნიერების სამინისტროს ვებგვერდზე განთავსებული ინფორმაცია სრულად იხილეთ ბმულზე:https://mes.gov.ge/content.php?id=7056&lang=geo&fbclid=IwAR0sD_4_tNFYUFqRCqnKZzfMHYB_PEBTrXNp5Vq8ELmQl3eVBudnctJ4DF0