რამდენი ადამიანია დასაქმებული საქართველოს ბაზრებზე?

უკანასკნელი ათწლეულის განმავლობაში ქვეყანაში სუპერმარკეტებისა და ჰიპერმარკეტების ქსელების განვითარების მიუხედავად, ბაზრები და ბაზრობები საცალო და საბითუმო ვაჭრობისთვის კვლავ მნიშვნელოვან სივრცედ რჩება.
დღეს საქსტატმა გამოაქვეყნა ქვეყანაში მოქმედი ბაზრების სტატისტიკური ანგარიში 2019 წლისთვის. დოკუმენტიდან ირკვევა, რომ მთლიანად ბაზრებსა და ბაზრობებზე 55.7 ათასი სავაჭრო ადგილია, ყოველდღიურად კი საშუალოდ 45.1 ათასი მოვაჭრე არის დაკავებული ბაზრებზე პროდუქციის რეალიზაციით. 
“2019 წელს საქართველოში ფუნქციონირებდა ბაზრების და ბაზრობების ორგანიზებით დაკავებული 208 ეკონომიკური სუბიექტი, რომელთა 30,8 პროცენტი თბილისშია, ხოლო 20,7 პროცენტი – იმერეთის, 12,0 პროცენტი – სამეგრელო-ზემო სვანეთის, 12,0 პროცენტი – კახეთის, 7,2 პროცენტი – ქვემო ქართლის, 5,3 პროცენტი – აჭარის, 4,3 პროცენტი – შიდა ქართლის, 2,9 პროცენტი – სამცხე-ჯავახეთის, 1,9 პროცენტი – გურიის, 1,9 პროცენტი – მცხეთა-მთიანეთის და 1,0 პროცენტი – რაჭა-ლეჩხუმსა და ქვემო სვანეთის რეგიონებშია განთავსებული.
2019 წელს საქართველოში მოქმედი ბაზრები, ბაზრობები და ბაზრობის ტიპის საწარმოები განთავსებული იყო 2,0 მლნ. კვადრატულ მეტრ ფართობზე. ამ ტერიტორიაზე განლაგებული დახლების სიგრძე 53,1 ათასი მეტრია, რომელთა 65,7 პროცენტი შენობაშია განთავსებული. ბაზრობებს გააჩნია 73 ვეტსანექსპერტიზის ლაბორატორია, 1360 – შემნახველი საკანი (საწყობი) 27,4 ათასი კვ. მეტრი ფართობით, 0,8 ათასი ტონის ტევადობის – 415 მაცივარი.