წელს საქართველოში თხილის ხარისხი გაუარესდა, მოსავალი კი 30%-ით შემცირდა. თხილის მწარმოებელთა ასოციაციაში აცხადებენ, რომ მიზეზი უხვი ნალექი და ფაროსანას გააქტიურებაა.
ამასთან, როგორც “ბიზნეს ფორმულას” ასოციაციაში განუცხადეს, თხილის სარეალიზაციო ფასი ადგილობრივ ბაზარზე გასულ წელთან შედარებით 1 ლარითაა შემცირებული.
“უხვი ნალექების გამო წამლობებიც შეფერხდა და ფერმერებმა ვერ მოახერხეს სრულად ჩაეტარებინათ სამუშაოები, გარდა ამისა ვერ მოხერხდა მინერალური სასუქების შეტანაც, გაზრდილი ფასის გამო, რაც თხილის ხარიხისთვის აუცილებელი პირობაა.
სარეალიზაციო ფასი ადგილობრივ ბაზარზე 3-5 ლარის ფარგლებში მერყეობს და გასულ წელთან შედარებით 1 ლარითაა შემცირებული. საექსპორტო ღირებულება კი 5 ევრო და 20 ცენტია”,- აცხადებს თხილის მწარმოებელთა ასოციაციის ხელმძღვანელი, გიორგი თოდუა.
ასოციაციაში თხილის საექსპორტო ბაზრების გაფართოების სურვილს გამოთქვამენ. გიორგი თოდუას თქმით, დაწყებულია მოლაპარაკებები ჩინეთთან 1000 ტონა კახური თხილის გულის ექსპორტთან დაკავშირებით, ასევე არსებობს მოლოდინი, რომ სამომავლოდ ქართული თხილი ინდოეთის ბაზარზეც გავა.
ცნობისთვის, ბოლო 8 თვის მონაცემებით, საქართველოდან თხილის ექსპორტის ღირებულებამ 45 მლნ აშშ დოლარს გადააჭარბა, რაც წინა წლის ანალოგიურ მაჩვენებელს 3.6%-ით უსწრებს, თხილის ექსპორტი სულ 35 ქვეყანაში განხორციელდა, ძირითადად კი ევროკავშირის ქვეყნებში, სადაც ჯამურად 33 მლნ აშშ დოლარის თხილია ექსპორტირებული.
Loading ...
