პროკურატურა კიდევ ერთი მაღალჩინოსანის საქმეს შეისწავლის

2021 წლის განმავლობაში შესამოწმებლად შერჩეულ 303 თანამდებობის პირის დეკლარაცია შემოწმდა. ამის შესახებ საჯარო სამსახურის ბიუროს ანგარიშშია აღნიშნული.

როგორც ანგარიშშია მოცემული, შემოწმებული 303 დეკლარაციიდან პროკურატურაში გადაიგზავნა – 1 საქმე. თუმცა, აღსანიშნავია, რომ არ კონკრეტდება, თუ რომელი თანამდებობის პირის მიერ გამოქვეყნებულ ქონებრივ დეკლარაციაში გამოიკვეთა ისეთი ნიშნები, რამაც საგამოძიებო უწყებისთვის მიმართვა გამოიწვია. ანგარიშში მხოლოდ ის არის აღნიშნული, რომ დეკლარაცია მუნიციპალიტეტის თანამდებობის პირს ეკუთვნოდა.

ამასთან, დადებითად შეფასდა 130 თანამდებობის პირის დეკლარაცია; დაჯარიმდა – 133; გაფრთხილდა – 32 და მონიტორინგი შეწყდა – 7 თანამდებობის პირზე, რის მიზეზსაც წარმოადგენდა ის გარემოება, რომ თანამდებობის პირის თანამდებობიდან გადადგომიდან, მისი დეკლარაციის შერჩევამდე, გასული იყო ერთ წელზე მეტი ვადა.

ცნობისთვის, ქონებრივი დეკლარაციის შევსების ვალდებულება საქართველოში 2 800-ზე მეტ თანამდებობის პირს აქვს. მათ შორის არიან: პრეზიდენტი, პარლამენტის წევრები, მინისტრები და მათი მოადგილეები, ეროვნული ბანკის პრეზიდენტი, საბჭოს წევრები და ა.შ.

www.bpn.ge