ესენი [ოპოზიცია] მელაპარაკებიან ევროპულ პერსპექტივაზე, ყველაზე ანტიევროპული ძალა დღეს მელაპარაკება ევროპულობაზე. ეს უბედურებაა, კაციჭამია კანიბალი რომ გველაპარაკებოდეს ვეგეტარიანელობაზე, იგივეა მათი მდგომარეობა , – ამის შესახებ პრემიერ-მინისტრმა, ირაკლი ღარიბაშვილმა პარლამენტის პლენარულ სხდომაზე განაცხადა, სადაც დღეს წლიური ანგარიშით წარდგა.
მთავრობის მეთაურის თქმით, ოპოზიციას სურდა რუსეთის პროვოცირება და საქართველოში მეორე მარიუპოლის მიღება.
ირაკლი ღარიბაშვილის განცხადებით, „ქართულმა ოცნებამ,“ ბიძინა ივანიშვილის მთავრობამ მოიტანა ასოცირება, თავისუფალი ვაჭრობა და უვიზო რეჟიმი.
„ხედავთ, რომ ძალიან რთული სიტუაციაა, მეგობრებო. უკრაინაში ომის გაჩერების არავითარი ნიშანი ჯერჯერობით არ ჩანს, სამწუხაროდ. ეს არის უბედურება, ყოველ დღე ათასობით ადამიანი იღუპება. ინგრევა ინფრასტრუქტურა და უკრაინას მილიარდობით ზარალი აქვს მიყენებული. უკრაინის ტერიტორიის 20% არის დაკარგული, ეს საშინელებაა. ამ დროს ეს ადამიანები გვიკიჟინებდნენ, რომ სანქციებს შეუერთდით, გააგზავნეთ ჩარტერები. რუსეთის პროვოცირება უნდოდათ, რომ აქ მეორე მარიუპოლი მიეღო ხალხს. ესენი მელაპარაკებიან ევროპულ პერსპექტივაზე, ყველაზე ანტიევროპული ძალა დღეს მელაპარაკება ევროპულობაზე. ეს უბედურებაა, კაციჭამია კანიბალი რომ გველაპარაკებოდეს ვეგეტარიანელობაზე, იგივეა მათი მდგომარეობა.
სად არის ბატონი მინაშვილი, რომ ახტა და არტისტულად იქცეოდა, მეგის ქარდავას და დათა ახალაიას ძმაკაცი, აკუნა, აკო მინაშვილი. მელაპარაკებით ეს ადამიანები ევროკავშირის დროშას ამოფარებული კრიმინალები, სააკაშვილი და მისი ეს ბანდა. რა პერსპექტივა უნდა მოუტანოს მაგალითად აკო მინაშვილმა, ან ხატია დეკანოიძემ ან ნებისმიერმა?! ჩვენ, ივანიშვილის მთავრობამ მოიტანა ასოცირება, თავისუფალი ვაჭრობა, უვიზო რეჟიმი. თქვენ ახლა უვიზო რეჟიმი რომ გაგეკეთებინათ, გადადგამდით ქვეყანას, წარმოგიდგენიათ რას იზამდნენ?!“, – განაცხადა ირაკლი ღარიბაშვილმა.
Loading ...
