საქართველოს პრეზიდენტმა, ადგილობრივი ტურიზმის გახსნისა და მხარდაჭერის ფარგლებში, დღეს პალიასტომის ტბა დაათვალიერა.
ვიზიტის შესახებ ინფორმაციას სალომე ზურაბიშვილის პრეს-ცენტრი ავრცელებს.
– “ტბა, რომელიც საქართველოში სიდიდით მეორეა, კოლხეთის ეროვნული პარკის შემადგენლობაში შედის. ამავდროულად ის ზღვის დონიდან ყველაზე დაბლა მდებარე და თევზით მდიდარი ტბაა საქართველოში. ეს ადგილი უნიკალურია ფრინველებზე დაკვირვებისთვის. ტბა გადამფრენი ფრინველების ერთ-ერთი ძირითადი გასაჩერებელი და გამოსაზამთრებელი ადგილია.
როგორც პრეზიდენტს ეროვნული პარკის წარმომადგენლებმა განუცხადეს, სწორედ უძველესი კოლხური ტყეებისა და უნიკალური ჭარბტენიანი ტერიტორიების დაცვის მიზნით შეიქმნა კოლხეთის ეროვნული პარკი 1999 წელს.
იმის გამო, რომ საქართველო რამსარის საერთაშორისო კონვენციასთანაა მიერთებული, რომელიც მიგრირებადი ფრინველებისათვის მნიშვნელოვან ჭარბტენიან ტერიტორიებს იცავს, კოლხეთის ეროვნულ პარკს საერთაშორისო მნიშვნელობა გააჩნია. 2019 წლის თებერვალში კი, მოხდა კოლხური ტყეებისა და ჭარბტენიანი ტერიტორიების ნომინირება იუნესკოს ბუნებრივი მემკვიდრეობის უბნად და ამჟამად საკითხი განხილვის სტადიაშია.”
პრეზიდენტის ვიზიტი დასავლეთ საქართველოში გრძელდება. ადგილობრივი ტურიზმის გახსნასა და მხარდაჭერასთან დაკავშირებით საქართველოს პრეზიდენტი გურიის, სამეგრელოსა და აჭარის რეგიონში მოგზაურობს, იგი რამდენიმე კურორტსა და დაცულ ტერიტორიას დაათვალიერებს.