“პოლიტიკოსების მთავარი ვალდებულება, მოთმენის გარდა არის ქცევის, ღირსეული ქცევის ვალდებულება” – სალომე ზურაბიშვილი

პოლიტიკოს ქალთა მიმართ ძალადობა ეს იქნება სიტყვიერი, თუ ხელით შეხლა, ის მაგალითია, რომელიც მერე საზოგადოებაზე გადადის. თუ საზოგადოება უყურებს, რომ ვინც ქვეყნის ელიტად ითვლება, თუ ისინი ამის უფლებას აძლევენ თავს, მაშინ სხვა რატომ უნდა იყოს შეზღუდული?! მაგალითი ყოველთვის არის ის, რაც განაპირობებს ადამიანების ქცევას, – ამის შესახებ საქართველოს პრეზიდენტმა სალომე ზურაბიშვილმა სასტუმრო „რადისონში“ საერთაშორისო კონფერენციას სიტყვით გამოსვლისას განაცხადა.

პრეზიდენტმა ისაუბრა ადამიანის უფლებების დაცვის დღეზე, რომელიც მისი თქმით, 10 დეკემბერს აღინიშნება. სალომე ზურაბიშვილმა ადამიანის უფლებების დაცვის კონტექსტში ახსენა ქალთა მიმართ ძალადობა და მათ შორის, პოლიტიკოს ქალთა მიმართა ძალადობა.

„რადგან ადამიანის უფლებების დღეზე სასაუბროდ გადავედი, არ შეიძლება არ შევეხო იმ ძალიან მტკივნეულ საკითხს,რომელსაც ჰქვია ქალთა მიმართ ძალადობა და პოლიტიკოს ქალთა მიმართ ძალადობა. არ არიან პოლიტიკოსები გამორჩეულები და ხშირად არის ნათქვამი, რომ პოლიტიკოსს აქვს თმენის ვალდებულება, რაც მართლაც სწორია, მაგრამ ამ მოთმინებასაც აქვს თავისი საზღვარი და ეს საზღვარი არის ღირსეული ქცევა ყველასი, რაც პოლიტიკაში ყველას მოეთხოვება. პოლიტიკოსების მიმართ ამომრჩევლის განსჯა სწორედ ამით უნდა იყოს განპირობებული, თუ როგორ ღირსეულად იქცევა პოლიტიკოსი პოლიტიკაში. პოლიტიკა არ არის რაღაც პრივილეგია, რომელიც უფლებას გაძლევს, როგორც გინდა ისე მოიქცე. ამას კიდევ სხვა განზომილება აქვს, რომ ქალთა მიმართ პოლიტიკური ძალადობა ეს იქნება სიტყვიერი, თუ ხელით შეხლა, ეს არის ის მაგალითი, რომელიც მერე გადადის საზოგადოებაზე. თუ საზოგადოება უყურებს, რომ ვინც ქვეყნის ელიტად ითვლება, ვინ როგორ თვლის, მაგრამ ვინც ითვლება ამ კატეგორიაში, თუ ისინი ამის უფლებას აძლევენ თავს მაშინ, სხვა რატომ უნდა იყოს შეზღუდული?! როგორც ვიცით, ყველანაირად, მაგალითი ყოველთვის არის ის, რაც განაპირობებს ადამიანების ქცევას. ამიტომ, პოლიტიკოსების მთავარი ვალდებულება, მოთმენის გარდა არის ქცევის, ღირსეული ქცევის [ვალდებულება] და მინდა ყველას ეს მოვუწოდო, თორემ საზოგადოებაში ჩვენ გვექნება მზარდი პრობლემა, საზოგადოება, რომელიც არის ისედაც დაძაბული, აგრესიული და ამაში ძალიან ბევრი რამე მონაწილეობს, პირველ რიგში, სოციალური ქსელები. ეს საზოგადოება, ამ მხრივ, ბევრად უფრო მოწყვლადია და ჩვენი, ყველას ვალდებულებაა, რომ მივცეთ უფრო მშვიდი გარემო, უფრო დაბალანსებული და უფრო ღირსეული, ერთმანეთის პატივისცემითა და არა, ერთმანეთის ლანძღვა-გინებით“, – განაცხადა სალომე ზურაბიშვილმა.