პარტიამ „ლელო საქართველოსთვის“ რეგიონული ოფისები გახსნა

პარტიამ “ლელო საქართველოსთვის” ზუგდიდსა და ქუთაისში რეგიონული ოფისები გახსნა.

ზუგდიდში შეკრებილებს სიტყვით პარტიის ლიდერმა მამუკა ხაზარაძემ მიმართა. მისი თქმით, მათი მთავარი მიზანია არჩევნების გზით ხელისუფლების შეცვლაა, რათა ქვეყანამ სწრაფად დაიწყოს განვითარება.

„რატომ ზუგდიდი? ვთვლით, რომ ეს არის მომავალი კარიბჭე მსოფლიოში, ვგულისხმობ ანაკლიას და ანაკლიის ქალაქს, რომლის პროექტიც მზად არის და ჩვენი ხელისუფლებაში მოსვლის დღიდანვე განახლდება მისი მშენებლობა. ეს არის ადგილი, სადაც უნდა გადავწყვიტოთ ჩვენი ყველაზე მთავარი პრობლემა აფხაზეთთან მიმართებაში. ეს უნდა გახდეს ქვეყნის აღმშენებლობის, წინსვლის და გამარჯვებების ადგილი. უახლოეს დღეებში სხვადასხვა ქალაქებში გავხსნით ოფისებს, მაგრამ როგორც მოგახსენეთ, მნიშვნელოვანი იყო პირველი ოფისი ყოფილიყო ქალაქ ზუგდიდში “, – თქვა ხაზარაძემ.

პარტიის ადგილობრივ ოფისს ალექსანდრე ახვლედიანი უხელმძღვანელებს. მისი ინფორმაციით, ადგილობრივ ორგანიზაციაში ამ ეტაპისთვის 200-მდე ადამიანია გაწევრიანებული.

„ჩვენ მზად ვართ შევკრათ განათლებული და პერსპექტიული ადამიანებისგან შემდგარი გუნდი, რათა დავდოთ შედეგი მომავალი სასიკეთო ცვლილებების სასარგებლოდ. დღეიდან ვერთვებით ყოველდღიურ ცხოვრებაში. რაც კი რეგიონისთვის მნიშვნელოვანი ფაქტი მოხდება მას ჩვენ წინ წამოვწევთ და ძალიან დიდ დისკომფორტს შეუქმნით ამ ხელისუფლებას“, – აღნიშნა ახვლედიანმა.

ქუთაისი მთელი რეგიონის ლოჯისტიკურ და ფინანსურ ცენტრად უნდა იქცეს – ამის შესახებ პარტია „ლელო საქართველოსთვის“ ლიდერმა მამუკა ხაზარაძემ ქუთაისის რეგიონული ოფისის გახსნისას განაცხადა. 

ქუთაისი უნდა იყოს ერთ-ერთი ყველაზე გამორჩეული ქალაქი. უნდა დავასრულოთ ის საბჭოური მენტალიტეტი, როდესაც თბილისი წყვეტს ქუთაისმა როგორ იცხოვროს. თბილისის თავკომბალობა უნდა დასრულდეს, – თქვა მამუკა ხაზარაძემ.

ხაზარაძის განცხადებით, მის გუნდს შეუძლია, სამუშაო ადგილების პრობლემა გადაჭრას და ემიგრაციაში წასული ქუთაისის მოსახლეობა სამშობლოში დააბრუნოს.

„მიგვაჩნია, რომ ქუთაისი უნდა გავხადოთ მთელი რეგიონის ლოჯისტიკურ და ფინანსურ ცენტრად. უახლოესი თვეების განმავლობაში დეტალურ გეგმას წარმოგიდგენთ იმისათვის, რომ ქუთაისს დაუბრუნდეს ის მნიშვნელობა, რაც მას ყოველთვის ჰქონდა ისტორიულად. ძალიან სამწუხაროა, რომ ქუთაისი დაცარიელებულია და აქ მცხოვრებთა უმეტესობა ქვეყნიდანაა გასული. ჩვენი ამოცანა იქნება, რომ დავძლიოთ უდიდესი გამოწვევა, შევქმნათ სამუშაო ადგილები და ეს ადამიანები დავაბრუნოთ უკან. ჩვენ ვიცით, ეს როგორ კეთდება. შეგვიქმნია ათიათასი სამუშაო ადგილი, რომელიც დღესაც ღირსეულად მუშაობს საქართველოს მასშტაბით. თითოეულ ქართველს გვაქვს ეს ფუნქცია, რომ დავრბუნდეთ ქუთაისში და მივცეთ მას ყველაზე სერიოზული დატვირთვა. ეს იქნება პოლიტიკური, ფინანსური, ლოჯისტიკური, ტურისტული და საგანმანათლებლო ცენტრის დატვირთვა. ქუთაისი უნდა იყოს ერთ-ერთი ყველაზე გამორჩეული ქალაქი.

პარტიის ქუთაისის ორგანიზაციის ხელმძღვანელი მამუკა მამალაძე იქნება.

პოლიტიკური გაერთიანება ლელო საქართველოსთვის 2019 წლის 22 დეკემბერს დაფუძნდა, როდესაც ლელო (საზოგადოებრივი მოძრაობა), შენების მოძრაობა და ახალი მემარჯვენეები გაერთიანდა. ლელოსთან გაერთიანების შემდეგ ორივე პარტიამ არსებობა შეწყვიტა. პოლიტიკური გაერთიანების დაფუძნებას წინ უძღოდა მამუკა ხაზარაძის მიერ 2019 წლის ზაფხულში საზოგადოებრივი მოძრაობა ლელოს დაარსება. საზოგადოებრივი მოძრაობა მამუკა ხაზარაძემ და ბადრი ჯაფარიძემ დააფუძნეს.