დეპუტატების ნაწილი პარლამენტში უკვე მივიდა. საკანონმდებლო ორგანოში ცოტა ხნის წინ მივიდნენ უმრავლესობის წევრები: დიმიტრი ხუნდაძე, თამაზ ნავერიანი და ნინო წილოსანი. პარლამენტში იმყოფებიან ირაკლი(დაჩი) ბერაია და მერაბ ქვარაია. პარლამენტის ყველა შესასვლელთან საპატრულო პოლიციის წარმომადგენლები არიან განლაგებულები. ისინი იმყოფებიან როგორც ჩიტაძის, ასევე ჭიჭინაძის ქუჩაზე. სწორედ სამართალდამცავების კონტროლის მეშვეობით უწევთ დეპუტატებს პარლამენტში შესვლა.
საპატრულო პოლიციის ხელმძღვანელის, ვაჟა სირაძის განცხადებით, დეპუტატებს პარლამენტის შენობაში შესვლა თავისუფლად შეუძლიათ. მისი თქმით, ადგილზე პოლიცია იმისთვისაა მობილიზებული, რომ საზოგადოებრივი წესრიგის დაცვა მოხდეს და პარლამენტმა ფუნქციონირება მშვიდ ვითარებაში განაგრძოს.
ყველას უნდა ჰქონდეს ერთი ინტერესი, სახელმწიფო ინტერესი და პირად ამბიციებზე ყველამ უნდა თქვას უარი, – ასე უპასუხა ჟურნალისტების შეკითხვებს მცხეთის მაჟორიტარმა დეპუტატმა დიმიტრი ხუნდაძემ, რომელიც პარლამენტში ცოტა ხნის წინ მივიდა.
ის ყველას კონსტრუქციულობისკენ და არჩევნებისთვის მომზადებისკენ მოუწოდებს.
„არის გაცხადებული, რომ საარჩევნო სისტემა 2020-ისთვის არ შეიცვლება, ის დარჩება შერეული სისტემით, ამიტომ ყველამ კონსტრუქციულობისკენ უნდა მოვუწოდოთ ერთმანეთს და საკუთარი პასუხისმგებლობა მაღალ რანგში ავიყვანოთ, მოვემზადოთ არჩევნებისთვის. სიტყვის გამოხატვის თავისუფლება უნდა იყოს შენარჩუნებული და ასევე უნდა იყოს შენარჩუნებული სახელმწიფოში სამართლებრივი წესრიგი. თუ ეს ირევა, რა თქმა უნდა, სახელმწიფო ინსიტიტუტებს ვალდებულება აქვთ, რომ ეს დაიცვან,“ – განაცხადა ხუნდაძემ.
www.interpressnews.ge
Loading ...
