პარლამენტთან მოშიმშილე თამაზ მაჭავარიანი შეუძლოდ გახდა და კლინიკაში გადაიყვანეს

გუშინ, პარლამენტის წინ მოშიმშილე თამაზ მაჭავარიანი შეუძლოდ გახდა და სასწრაფო ეკიპაჟის წევრებმა კლინიკაში გადაიყვანეს. კოალიცია ცვლილებებისთვის ერთ-ერთი წევრის, გედევან ფოფხაძის განცხადებით მაჭავარიანი დღეს დილით გამოწერეს კლინიკიდან და მისი ჯანმრთელობის მდგომარეობა სტაბილურია და პარლამენტთან კვლავ აგრძელებს შიმშილობას.

გედევან ფოფხაძემ ასევე კომენტარი გააკეთა  იმედის გავრცელებულ კადრებზე, სადაც მათი თქმით მოშიმშილე საკვებს იღებს. ფოფხაძის განმარტებით მოშიმშილეები ყოველ დღე ეზიარებიან და აღნიშნულ კადრებში მოშიმშილე სეფისკვერს იღებს.

1 ნოემბერს, თამაზ მაჭავარიანმა ტვ პირველს განუცხადა, რომ ის ოცნების მმართველობის დროს, 2016 წელს ციხეში იჯდა, რა დროსაც მას ჯანმრთელობის პრობლემები შეექმნა და საავადმყოფოში გადაყვანა დასჭირდა. მაჭავარიანის განცხადებით, მას მსუბუქი ჯანმრთელობის პრობლემა აღენიშნებოდა ფეხზე და ოპერაციის გაკეთება დასჭირდა — ოპერაციიდან 36 საათის შემდეგ “მიცვალებულივით თეთრ ზეწარში ვიყავი გახვეული მთლად, ხელები გულზე დაწყობილი, პირი აკრული, ფეხები გაკოჭილი, მღვდელი მადგა თავზე და მაზიარებდა”. მოშიმშილის განცხადებით მან მრავალჯერ მიმართა თენგიზ შარმანაშვილს ციხიდან მისი ჯანმრთელობის მდგომარეობის შესახებ, მაგრამ რეაგირება არ მოყვა მის მოთხოვნას გასწეოდა შესაბამისი სამედიცინო დახმარება.

ცნობისთვის, 28 ოქტომბერს გედევან ფოფხაძესთან ერთად შიმშილობა აქტივისტებმა დავით ჭელიძემ, კახა ელიოზიშვილმა, თამაზ მაჭავარიანმა და დარეჯან ცხვიტარიამ დაიწყეს —ფოფხაძის განცხადებით, შიმშილობის მე-16 დღეა.

შსს-მ ერთ-ერთი მოშიმშილე დავით ჭელიძე 28 ოქტომბერს რუსთაველის გამზირის ხელოვნურად გადაკეტვის ბრალდებით დააკავა. მოსამართლე ზვიად ცეკვავამ მას 14-დღიანი ადმინისტრაციული პატიმრობა შეუფარდა. მას შემდეგ, რაც დავით ჭელიძემ იზოლატორი დატოვა ის პარლამენტის წინ აგრძელებს შიმშილობას.