![](https://guria.tv/wp-content/uploads/2023/11/3-1024x683.jpg)
როდესაც სახლში კომფორტული და მყუდრო ინტერიერის შექმნას ეხება საქმე, ბევრ სხვა დეტალთან ერთად, ოთახების განლაგება უმნიშვნელოვანეს როლს თამაშობს. ოთახების გონივრულად დაგეგმარებას შეუძლია, სახლი თქვენს სურვილებსა და საჭიროებებზე მორგებული გახადოს. თუ ახალ სახლში გადადიხართ ან რემონტის პროცესში ხართ, ამ ბლოგში იმ ძირითად ფაქტორებზე მოგიყვებით, რაც თქვენთვის სახლში გადატებულ დროს უფრო კომფორტულს გახდის.
განსაზღვრეთ თქვენი საჭიროებები
სანამ ოთახების განლაგების ვარიანტებს განიხილავთ, აუცილებელია თქვენი პირადი საჭიროებებისა და ცხოვრების სტილის განსაზღვრა. თავდაპირველად საკუთარ თავს რამდენიმე კითხვა დაუსვით:
- რამდენი საძინებელი და სააბაზანო გჭირდებათ?
- რა ტიპის საერთო სივრცეებია საჭირო თქვენთვის ან თქვენი ოჯახის წევრებისთვის?
- სახლიდან მუშაობთ ან გჭირდებათ სპეციალური სამუშაო ადგილი?
- გართობის მოყვარული ხართ თუ ინტიმურ შეკრებებს ანიჭებთ უპირატესობას?
- რა სახის დეტალების შეტანა გსურთ ინტერიერში?
თქვენი პირადი მოთხოვნილებებისა და საჭიროებების გათვალისწინება ამოსავალი წერტილია მყუდრო და კომფორტული სახლის მოწყობისთვის.
შექმენით „ღია სივრცის ეფექტი“
იმისათვის, რომ სახლში მეტი სიმყუდროვე შექმნათ, გამოიყენეთ „ღია სივრცის ეფექტი“. ამისათვის შეგიძლიათ, მისაღები ოთახი და სამზარეულო გააერთიანოთ. საზღვრების არარსებობით თქვენ ერთიანობის განცდას შემნით. თუ გინდათ, რომ შექმნათ უფრო მშვიდი, ინტიმური ატმოსფერო, შიდა კარებით გამოყავით საძინებლები დანარჩენი სივრცისგან და ამ გზით განმარტოებითვისაც დაიტოვებთ ადგილს.
გაითვალისწინეთ საძინებლების რაოდენობა
თუ გინდათ, რომ მშვიდი ატმოსფერო შეინარჩუნოთ, თქვენი სახლისთვის საჭირო საძინებლების რაოდენობა წინასწარ გათვალეთ. გადაწყვეტილება იმის მიხედვით უნდა მიიღოთ თუ რამდენი ადამიანია ოჯახში. თუ თქვენი სახლის ფართობი და განლაგება ამის საშუალებას იძლევა,სტუმრისთვისაც მოაწყვეთ ოთახი. მნიშვნელოვანია, წინასწარ გათვალოთ საძინებლების ადგილმდებარეობაც. თუ ბავშვი გყავთ ან დაოჯახებას ფიქრობთ, უმჯობესია, ბავშვის ოთახი საძინებელთან ახლოს იყოს. თუ ზრდასრული შვილები გყავთ, ეცადეთ თქვენი საძინებელი მათი ოთახებისგან მოშორებით იყოს, რათა მუსიკის, ვიდეო თამაშებისა თუ სხვა აქტივობებისგან გამოწვეულმა ხმაურმა არ შეგაწუხოთ.
გააკეთეთ ფუნქციური ზონები
გარდა საძინებლების რაოდენობის გათვლისა, სახლში სასიამოვნო გარემოს შესანარჩუნებლად, გირჩევთ, შედარებით დიდ ოთახებში „ფუნქციური ზონები“ მოაწყოთ. მაგალითად, მისაღებ ოთახში შეიძლება მოაწყოთ საკითხავი კუთხე, სასაუბრო ადგილი ან ტელევიზორის საყურებელი სივრცე.
დაიცავით სიმეტრია
შესაძლოა, აქამდე არ გიფიქრიათ, რომ სიმეტრიას შეუძლია ოთახში წესრიგისა და ბალანსის განცდა შექმნას. ამის მიღწევა ოთახის ორივე მხარეს შესაფერისი ავეჯისა და დეკორატიული ნივთების განთავსებით შეგიძლიათ. მაგალითად, მაგიდამ და წყვილმა სავარძელმა შესაძლოა შექმნას სიმეტრიისა და ჰარმონიის განცდა თქვენს სახლში.
ფოკუსირდით ცენტრალურ წერტილზე
ყველა ოთახს უნდა ჰქონდეს ცენტრალური წერტილი, იქნება ეს ბუხარი, დიდი ფანჯარა ლამაზი ხედით, თუ ხელოვნების ნიმუში. განალაგეთ თქვენი ავეჯი ამ ფოკუსური წერტილის გარშემო, რათა მყუდრო და ვიზუალურად მიმზიდველი გარემო შექმნათ.
გამოიყენეთ თბილი განათება და ფერები
არ დაგავიწყდეთ, რომ სახლში მშვიდი ატმოსფეროს შესაქმნელად ფერსა და განათებას გადამწყვეტი მნიშვნელობა აქვს. მეტი სიმყუდროვისთვის თბილი განათება და ფერები გამოიყენეთ, როგორც კედლებზე, ასევე ავეჯსა და ტექსტილზე.
შეიტანეთ პირადი შტრიხები
გარდა ზემოთ ჩამოთვლილი ტექნიკური დეტალებისა, მნიშვნელოვანია გახსოვდეთ, რომ სახლის ინტერიერში პირადი შტრიხების დამატება აუცილებელია. ამისათვის, შეგიძლიათ ფოტოები და სხვადასხვა სახის პირადი ნივთები გამოიყენოთ და სახლი თქვენი პიროვნების ნაწილად აქციოთ.
იმისათვის, რომ თქვენთვის სახლში ყოფნა სიმყუდროვესთან, სიმშვიდესა და განტვირთვასთან ასოცირდებოდეს, დაუთმეთ დრო ექსპერიმენტებს, სცადეთ ავეჯისა და დეკორატიული ნივთების სხვადასხვა განლაგება, შეარჩიეთ თქვენთვის საყვარელი თბილი ფერები, ყურადღება მიაქციეთ განათებას და რაც მთავარია და შეიტანეთ პირადი შტრიხები. ამ ყველაფრის შედეგად, თქვენთვის სახლი გახდება ადგილი, სადაც თავს ყველაზე მშვიდად და კომფორტულად იგრძნობთ.