ოზურგეთის მუნიციპალიტეტის სოფელ ბახვში კორონავირუსით და-ძმა გარდაიცვალა

ოზურგეთის მუნიციპალიტეტის სოფელ ბახვში ერთი ოჯახიდან კორონავირუსით ორი ადამიანი, ახალგაზრდა და – ძმა გარდაიცვალა. გარდაცვლილების დაინფიცირება რამდენიმე კვირის წინ მოხდა. ისინი მკურნალობას ბათუმის ერთ-ერთ კოვიდკლინიკაში გადიოდნენ. დის მდგომარეობა უფრო ადრე დამძიმდა და 3 აგვისტოს გარდაიცვალა. მისი ძმის გარდაცვალებაზე შეტყობინება კი ოზურგეთის საზოგადოებრივ ჯანდაცვაში დღეს მიიღეს. საგულისხმო დეტალი გახლავთ ის , რომ და-ძმას თანმხლები დაავადებები არ ჰქონიათ. ასევე, ისინი კოვიდის საწინააღმდეგო ვაქცინით აცრილები არ ყოფილან.

ბახველი და-ძმის კორონავირუსით გარდაცვალებას ფეისბუქ პოსტით ბახვის საჯარო სკოლის დირექტორი, მზია ვაშალომიძე ეხმიანება.

“ჩემი პატარა სოფლისთვის მოიცალა სიკვდილმა, ზედიზედ წაიყვანა საუკეთესო და გამორჩეული ახალგაზრდები, კახა ბოლქვაძე სულ ახალი თავზარდამცემი ტკივილია!!! რამდენიმე დღის წინ მისი ულამაზესი, სიცოცხლით სავსე და ეკა იმსხვერპლა კოვიდმა, ახლა კახა… კახა გამორჩეული იყო თავისი ზნესრულობით, უწესიერესი და უკეთილშობილესი, ღვთისმოსავი, საუცხოო შვილი, საიმედო მეუღლე და დასაყრდენი ვერიკოსთვის და არაჩვეულებრივი მამა ასეთ კახას იცნობდა ყველა. თვალწინ მიდგას როგორ მოჰყავდა საზირებლად ხელში ატატებული მისი მერცხლები. სიტყვები სადღაც გაფრინდა , ვერ ვახერხებ ნუგეში ვცე სიბერეგამწარებულ მშობლებს, ასევე უპატიოსნეს და უკეთილშობილეს ადამიანებს.ხუთი ობოლი შვილიშვილი დარჩა ეკასგან და კახასგან მათ იმედზე, ძნელია კიარადა უძნელესი… ვუსამძიმრებ ოჯახს, მთელს სოფელს , ბახვის წმინდა ნინოს სახლობის ტაძრის მრევლს, გლოვის დრო დაგვიდგა… ნათელი დაუმკვიდროს უფალმა კახას სულს!”