ოზურგეთის მუნიციპალიტეტში სხვადასხვა სტრუქტურებში ცვლილებები ხორციელდება. ამ ეტაპზე ცნობილი გახდა, რომ ოზურგეთის მომსახურების ცენტრისა და საფეხბურთო კლუბ ”მერცხალის” შემდეგ ხელმძღვანელი იცვლება ოზურგეთის სკოლამდელი აღზრდის ცენტრშიც. მერიის პრესსამსახურის ინფორმაციით, მაკა ჭყონიამ სამსახურიდან გათავისუფლების შესახებ განცხადება უკვე დაწერა. ვინ ჩაანაცვლებს მას, ამ ეტაპზე უცნობია.
„ოზურგეთის მუნიციპალიტეტის მერიაში, სამსახურებისა და განყოფილებების უფროსებთან დაკავშირებით, საკადრო ცვლილება არ განხორციელებულა. რაც შეეხება, მერიის დაქვემდებარებაში მყოფ ა(ა)იპ-ებსა და შპს-ებს: „ოზურგეთის მომსახურების ცენტრის,“ „სკოლამდელი აღზრდის ცენტრის“ და საფეხბურთო კლუბ „მერცხალის“ ხელმძღვანელებმა სამსახურიდან განთავისუფლების შესახებ განცხადება დაწერეს. ამჟამად, ა(ა)იპ-ებსა და შპს-ებში განხორციელდა 1 საკადრო ცვლილება – ოზურგეთის მერმა და მოადგილეებმა, თანამშრომლებს წარუდგინეს და დანიშნეს საფეხბურთო კლუბ „მერცხალის“ ახალი ხელმძღვანელი, ბატონი ლაშა ლექვინაძე. საკადრო ცვლილებები, რომლებიც ოზურგეთის მუნიციპალიტეტის მერიაში, ასევე, ა(ა)იპ-ებსა და შპს-ებში განხორციელდება, ყველა დაინტერესებული პირისთვის გახდება საჯაროდ ცნობილი.“ – უთხრა ”გურიაTV”-ის ოზურგეთის მერიის პრესსამსახურმა ნინო ბახტაძემ.
Loading ...