ოზურგეთის მეორე საჯარო სკოლა – ერთ-ერთი უძველესი სასწავლებელი საქართველოში

პოლიტიკოსი და დიპლომატი ზვიად კვაჭანტირაძე ფეისბუქში ოზურგეთის მეორე საჯარო სკოლის შესახებ სტატუსს აქვეყნებს. მისი თქმით, გეგმავს მშობლიურ სკოლას უფრო ვრცელი წერილი მოუძღვნას:

”ვაპირებ სრულად გამოვაქვეყნო ერთი ვრცელი წერილი ჩემს მშობლიურ ოზურგეთის მეორე სკოლაზე. მანამდე კი მოკლედ გეტყვით, რომ მეორე სკოლა ერთერთი უძველესი სასწავლო დაწესებულებაა მთელ საქართველოში. იგი 1839 წელს დაარსდა. შესაბამისად 182 წლისაა . სხვადასხვა პერიოდში სკოლას სხვადასხვა სახელი და სტატუსი ქონდა.
1850-1874 წელი – ოზურგეთის სამაზრო სასწავლებელი;
1874 წლიდან – ოზურგეთის საქალაქო სასწავლებელი;
1933-39 წლებში– #1 ჯერ შვიდწლიანი სკოლა, შემდეგ არასრული სკოლა;
1944 წლიდან – მახარაძის ქალთა სკოლა;
1955 წლიდან – მეორე საშუალო სკოლა, რომელიც დღეს ნოდარ დუმბაძის სახელობისაა.

ოზურგეთის სამაზრო სასწავლებელი ოფიციალურად გაიხსნა 1850 წლის 21 თებერვალს და მოთავსებული იქნა ოზურგეთის სამხედრო სკოლისათვის ახლადაგებულ შენობაში.

მოსამზადებელი კლასის მასწავლებელი იყო თავადი ივანე ნაკაშიძე, სასწავლებლის ზედამხედველი გახლდათ ივანე განგესოვი, საღვთო სჯულისა და ქართული ენის მასწავლებელი – გიორგი ქიქოძე, სასწავლებლის დროებითი მმართველი – ივანე ნაკაშიძე.

1852 წ. სასწავლებელში მეორე კლასი გაიხსნა. 1859-73 წლებში პედაგოგოთა შემადგენლობაში ცვლილებებია. პირველი კლასის მასწავლებლად ინიშნება გრიგოლ აკოფოვი, ხოლო მასწავლებლებად დასაქმებულები არიან: სიმონ ქიქოძე, მელიტონ ლორთქიფანიძე, ვლადიმერ გრიგორიევი, ნ. თაყაიშვილი, ვ. პეტრიაშვილი, ხოლო სამაზრო სასწავლებლის მოსწავლეები არიან, შემდგომში ფართოდ ცნობილი მოღვაწეები : ”თამარიანის” ავტორი თავადი სიმონ გუგუნავა, უდიდესი ენათმეცნიერი და ისტორიკოსი, აკადემიკოსი ნიკო მარი, ჩვენი უდიდესი ეროვნული მოღვაწე, “საქართველოს მეჭურჭლეთუხუცესი” საქართველოს მეცნიერებათა აკადემიის ნამდვილი წევრი, აკადემიკოსი ექვთიმე თაყაიშვილი, პედაგოგი და საზოგადო მოღვაწე გიგო შარაშიძე და ბევრი სხვა. დანარჩენი წერილში – წერს ფეისბუქზე ზვიად კვაჭანტირაძე.