ოზურგეთის აგრარული ბაზარი უკვე ოთხი დღეა დაკეტილია. ბაზრის დახურვა მას შემდეგ გადაწყდა, რაც ადგილობრივმა ხელისუფლებამ და პოლიციამ ბაზარში ხალხმრავლობა ვერანაირი მეთოდით ვერ განმუხტა. თუმცა გარემოს დაცვისა და სოფლის მეურნეობის მინისტრის ლევან დავითაშვილის განცხადებით, იმ შემთხვევაში, თუ აგრარული ბაზრები გაითვალისწინებენ რეკომენდაციებს და დაიცავენ სტანდარტებს, რომლებიც სურსათის ეროვნული სააგენტოს მიერ არის დამტკიცებული, მაშინ ისინი ფუნქციონირებას შეძლებენ.
”მოთხოვნები უკავშირდება მოვაჭრე პერსონალის სპეციალური დამცავი საშუალებებით უზრუნველყოფას, ჰიგიენური პირობების და სანიტარული პირობების მკაცრად დაცვას, სადეზინფექციო სამუშაოების ყოველდღურ რეჟიმში ჩატარებას. მოთხოვნები ასევე უკავშირდება მიკვლევადობას – თითოეული მოვაჭრე პერსონალის შესახებ ინფორმაციის არსებობას, მათ იდენტიფიკაციას და რეგისტრაციას იმისთვის, რომ მიკვლევადი იყოს თითოეული მოვაჭრე პერსონალის საქმიანობა, მათი კონტაქტები, მათ შორის, მნიშვნელოვანია, რომ განისაზღვროს სად მოძრაობდნენ, როგორი იყო მათი მოგზაურობის სტატისტიკა და ისტორია. ძალიან მნიშნელოვანია, ვისთან იმყოფებოდნენ კონტაქტში ბოლო 14 დღის განმავლობაში. მნიშვნელოვანია, რომ კონკრეტული დაავადების მქონე პერსონალი არ დაიშვება აგრარულ ბაზრებში. 70 წელს გადაცილებული მოვაჭრეებისთვის ასევე არსებობს შეზღუდვები.“ განაცხადა ლევან დავითაშვილმა.
ოზურგეთის აგრარული ბაზრის დირექტორი სოსო სიხარულიძე ”გურიაTV”-თან საუბრისას ამბობს, რომ ეს ინფორმაცია აქვს და ცდილობს რეკომენდაციები მაქსიმალურად გაითვალისწინოს, რათა ბაზრის გაღების შესაძლებლობა მიეცეს.
” არის სხვადასხვა რეკომენდაცია. ბაზარში არ უნდა შემოვიდნენ 70 წელს გადაცილებული პირები, უნდა იყოს მაქსიმალურად დიდი ფართი ბაზარში, რომ მოქალაქეებს თავისუფლად გადაადგილების შესაძლებლობა მიეცეთ. ამისთვის საჭიროა დახლები გადაავადგილოთ და შიგნით შევწიოთ. უკვე მიმდინარეობს ეს სამუშაოები. ვერ დაგპირდებით რამდენ ხანში, მაგრამ ყველაფერს ვაკეთებთ, რომ ოზურგეთის აგრარული ბაზარი გაიხსნას” – განაცხადა სოსო სოხარულიძემ.
Loading ...