სახელმწიფო იყენებს ყველა სიბინძურეს და ინსტრუმენტს იმისათვის, რომ ოპონენტების დევნა განახორციელოს და შეაშინოს მოსახლეობა. ეს არის ხელწერა, რითაც აპირებს “ქართული ოცნება” მმართველობის გაგრძელებას, – ასე ეხმაურება “ნაციონალური მოძრაობის” წევრი, დეპუტატი ნონა მამულაშვილის სუს-ის ბრიფინგს.
მისი თქმით, 30 რიცხვი გადამწყვეტი თარიღია და მოსახლეობამ “ქართული ოცნება” საბოლოოდ უნდა “მოიცილოს და ჩამოაშოროს მმართველობას”.
“ბოლო რამდენიმე წლის განმავლობაში “ქართულმა ოცნებამ” უკვე სავარაუდოდ მე-6 თუ მე-7 სახელმწიფო გადატრიალება აღმოაჩინა და ამას აკეთებს წინასაარჩევნო პერიოდში. ყოველთვის მოიძებნა ძალები, რომლებიც თურმე აპირებდნენ, რომ “ქართული ოცნება” აეყირავებინათ, სახელმწიფო გადატრიალება მოეწყოთ და ა.შ. ყველა კვალი კი მიდის მიხეილ სააკაშვილთან.
ამისთანა მორიგ სისულელეზე და ამ ფანტაზიის ავადმყოფურ გამოვლინებაზე ძალიან მიჭირს კომენტარის გაკეთება. სირცხვილია, როდესაც სახელმწიფო იყენებს ყველა იმ სიბინძურეს და ინსტრუმენტს იმისათვის, რომ ოპონენტების დევნა განახორციელოს, შეაშინოს მისახლეობა, მოისყიდოს და ეს არის ხელწერა, რითიც აპირებს “ქართული ოცნება” მმართველობის გაგრძელებას.
ქართველ ხალხს აქვს საშუალება, რომ ხვალ “ქართული ოცნება” საბოლოოდ მოიცილოს და ჩამოაშოროს მმართველობას. ქვეყნისთვის დგას გადამწყვეტი მომენტი. მიხეილ სააკაშვილი რომელმაც ფაქტობრივად თავისი სიცოცხლე დათმო იმისათვის, რომ საქართველოს რამე ეშველოს და ჩვენ დავიხსნათ თავი ამ პრორუსული ძალისგან, არის პუტინის ნომერ პირველი მტერი და “ქართული ოცნება” ებრძვის მიხეილ სააკაშვილს. ეს არის ძალიან ნათელი მაგალითი იმის, თუ ვის ემსახურება “ქართული ოცნება”.
30 რიცხვი იქნება გადამწყვეტი თარიღი და საქართველოს მოსახლეობამ აუცილებლად ყველაფერი უნდა იღონოს იმისათვის, რომ მოვიდეს არჩევნებზე, მისცეს ხმა ნებისმიერ ოპოზიციურ პარტიას და ყველაფერი გავაკეთოთ იმისათვის, რომ არცერთი ხმა არ დაიკარგოს და “ქართულმა ოცნებამ” არ მოგვპაროს მომავალი”, – განაცხადა ნონა მამულაშვილმა.
ინფორმაციისთვის, საქართველოს სახელმწიფო უსაფრთხოების სამსახურის სახელმწიფო უსაფრთხოების დეპარტამენტი სახელმწიფო ხელისუფლების დამხობის მიზნით შეთქმულების ფაქტზე გამოძიებას აწარმოებს. უწყების ინფორმაციით, გამოძიების ფარგლებში მოპოვებული მტკიცებულებების თანახმად დგინდება, რომ საქმის ფიგურანტები გეგმავენ გარკვეულ დესტრუქციულ ქმედებებს. კერძოდ, მსჯავრდებულ მიხეილ სააკაშვილის ჯანმრთელობის მდგომარეობის გაუარესების შემთხვევაში, მისი გლდანის N8 სასჯელაღსრულების დაწესებულებაში ეტაპირებისათვის ხელის შეშლის მიზნით, აღნიშნული სასჯელაღსრულების დაწესებულებასთან მისასვლელი საავტომობილო გზების სხვადასხვა საშუალებით ბლოკირებას. გამოძიება სისხლის სამართლის კოდექსის 315-ე მუხლის პირველი ნაწილით მიმდინარეობს, რაც სასჯელის სახით 5-დან 8 წლამდე თავისუფლების აღკვეთას ითვალისწინებს.
www.interpressnews.ge
Loading ...
