ნაბეღლავში კომპანია "წყალი მარგებელის" თანამშრომლების გაფიცვა გრძელდება

ჩოხატაურის მუნიციპალიტეტის სოფელ ნაბეღლავში კომპანია “წყალი მარგებელის” თანამშრომლების გაფიცვა გრძელდება. გუშინდელ გაფიცულებს დღეს დანარჩენი თანამშრომლებიც შეუერთდნენ.

გაფიცულების ინფორმაციით, ქარხანა ფაქტიურად გაჩერებულია. დასაქმებულები დაბალ ანაზღაურებას და არასათანადო შრომით პირობებს აპროტესტებენ და ხელმძღვანელობისგან საათობრივი ანაზღაურების გაზრდას მოითხოვენ.

გაფიცულების თქმით, არის შემთხვევები, როცა მათი სამუშაო დრო 24, ხანაც 36 საათის მანძილზე უწყვეტად გრძელდება. ზეგანაკვეთური შრომის, დღის და ღამის საათების შესაბამისი ანაზღაურება კი კომპანიაში არ არსებობს.

“იმ სამუშაოსთან შედარებით, რომელსაც ვწევთ, ჩვენი ანაზღაურება მიზერულია. საათში 3 ლარს გვიხდიდნენ, ერთი თვის წინ 50 თეთრი მოგვიმატეს. გვინდა, 5 ლარამდე მაინც გაიზარდოს საათობრივი ხელფასი. ხან 36 საათის მანძილზე გადაბმულად ვმუშაობთ, ხან ტომრებზე, ხანაც მუყაოს ქაღალდებზე გვძინავს. სამუშაო პირობების გაუმჯობესებაც გვჭირდება. ყველას ბანკის ვალები გვაქვს, ანაზღაურება კი ძალიან ცოტაა. თვეობით რომ მოგვიწიოს აქ დგომა, ვიდგებით”- აცხადებენ თანამშრომლები.

დღის ბოლო განცხადება გაავრცელა „მარგებელი ჰოლდინგმა”. 

როგორც განცხადებაშია აღნიშნული, ჰოლდინგი ყველანაირ ღონეს მიმართავს, რათა ცივილურ და სამართლებრივ ფარგლებში გადაწყდეს ყველა განსახილველი საკითხი თანამშრომლებისა და კომპანიების საუკეთესო ინტერესების გათვალისწინებით.

„განვმარტავთ, რომ ამ ეტაპზე მნიშვნელოვანია მიმდინარე პროცესების კანონის ჩარჩოებში მოქცევა. ყველაფერი კეთდება, რათა ნებისმიერი შემდგომი ნაბიჯი იყოს სამართლებრივად გამართული, რაც შედის როგორც დასაქმებულთა, ასევე კომპანიათა ინტერესებში. ამ ეტაპზე ხელმძღვანელებთან ერთად პროცესში ჩართული არიან როგორც შიდა, ასევე მოწვეული იურისტები, რათა პროცესი წარიმართოს კანონის მოთხოვნათა სრული დაცვით.

პარალელურად, ორივე კომპანიაში, მართალია შეფერხებებით, მაგრამ მაინც ვაგრძელებთ სამუშაო პროცესს. ეს სასიცოცხლოდ მნიშვნელოვანია ჰოლდინგის გადასარჩენად, განსაკუთრებით კი იმის ფონზე, რომ რთული 2020 წელი ჰოლდინგმა მნიშვნელოვანი ზარალით დაასრულა. მიუხედავად ფინანსური სირთულეებისა, დასაქმებულთა წინაშე არსებული ვალდებულებები სრულდებოდა და სრულდება შეუფერხებლად.

გვინდა, მადლობა მოვახსენოთ ყველა იმ თანამშრომელს, რომელმაც გამოიჩინა გულისხმიერება და მიუხედავად არსებული ვითარებისა, განაგრძობს მუშაობას.

ხოლო რაც შეეხება ჩვენს იმ თანამშრომლებს, რომელთა ინიციატივითა და ორგანიზებითაც შექმნილია აღნიშნული ვითარება, როგორც ზემოთ აღვნიშნეთ, ყველანაირ ღონეს მივმართავთ, რათა ცივილურ და სამართლებრივ ფარგლებში გადავწყვიტოთ ყველა განსახილველი საკითხი ჩვენი თანამშრომლებისა და კომპანიების საუკეთესო ინტერესების გათვალისწინებით“, – აღნიშნულია განცხადებაში.