“ხვალ დამატებით გამოვაცხადებ ჩემ პირად გეგმებს”,-ამის შესახებ საქართველოს ყოფილმა პრეზიდენტმა მიხეილ სააკაშვილმა სოციალურ ქსელში გავრცელებულ ვიდეო-მიმართვაში განაცხადა, სადაც 8 ნოემბერს, ოპოზიციის მიერ დაანონსებულ აქციას გამოეხმაურა.
მიხეილ სააკაშვილის თქმით, ქართველი ერი გაქრობის საფრთხის წინაშე აღმოჩნდა.
„8 ნოემბერს წყდება ვართ თუ არა ჩვენ ერი, თავმოყვარე ხალხი, გვინდა არსებობა, თავისუფლება, მომავალი, თუ ბიძინა ივანიშვილი მართალია და ყველაფერი შეიძლება გადაატაროს ისე, რომ საბოლოოდ, მონობაში და ფეხქვეშ გაგვიგოს. ეს საკითხი წყდება ხვალ. ამიტომ ახლა, როგორც არასდროს, როდესაც ყველა ოპოზიციური ძალა გაერთიანდა, როდესაც ადამიანების ამბიციები აღარაფერს ნიშნავს, როცა დაგვიდგა მთავარი საკითხი ყოფნა-არყოფნის, ჩვენი ერის გაქრობის საფრთხის წინაშე აღმოვჩნდით, მინდა, მოვუწოდო ყველა ჩემს მომხრეს, დადგეს ქუჩაში ხალხთან ერთად. არის მომენტები, როდესაც ეს არის პოლიტიკის კეთების ერთადერთი და უმაღლესი ფორმა, ეს არის ერის თვითგადარჩენის ერთადერთი ფორმა. ხვალ ეს ფორმა დგება, ჩვენ უნდა დავიწყოთ ხვალ და გავაგრძელოთ მანამ, სანამ არ მოვიპოვებთ გამარჯვებას! მე ამ ბრძოლაში ბოლომდე ვარ ჩართული. ხვალ დამატებით გამოვაცხადებ ჩემ პირად გეგმებს და რა თქმა უნდა, მე ვიქნები ერთ-ერთი თქვენგანი. ისევე როგორც ახლა, ყველამ უნდა ჩავკიდოთ ხელი. ძალიან დიდი იმედი მაქვს თითოეული თქვენგანის. ქართველი ახალგაზრდების, რომლითაც ძალიან ვამაყობ, ჩვენი ძველი აქტივისტების და ახალშეძენილი ხალხის, აპოლიტიკურების, ვისაც უყვარს საქართველო და სჯერა მისი მომავლის. ახლა არ ვიყოფით ჩვენ პარტიებით, არ ვიყოფით წარსულის სხვადასხვა გაუგებრობის მიხედვით, ახლა ვერთანდებით, ძალა ერთობაშია საქართველოს გადაარჩენს ერთობა“,-განაცხადა სააკაშვილმა.
Loading ...