"მიწები მუქარით დაგვათმობინეს" – საპროტესტო აქცია სუფსაში

ლანჩხუთის მუნიციპალიტეტის სოფელ სუფსის მოსახლეობამ საპროტესტო აქცია გამართა. ადგილობრივების განცხადებით, ქობულეთი-გრიგოლეთის ავტომაგისტრალის მშენებლობისას, 2018 წელს, საავტომობილო გზების დეპარტამენტმა კუთვნილი მიწები მიზერულ თანხად, მუქარის შემცველი პირობით დაათმობინა. სუფსელები აცხადებენ, რომ ამავე ავტობანის მშენებლობისას ოზურგეთის მუნიციპალიტეტში მცხოვრებ მოსახლეობას, რომელთაც მიწები ამავე ლოტში, 12 კილომეტრიან მონაკვეთში ჰქონდათ, იმავე კატეგორიის და ფუნქციის ნაკვეთებში ბევრად მეტი, 23 ლარიდან 60 ლარამდე გადაუხადეს. ხოლო ერთჯერადი კომპენსაციის სახით კვადრატულ მეტრში სუფსელებმა 80 თეთრი, ხოლო ოზურგეთის მუნიციპალიტეტის მცხოვრებლებმა 23 ლარამდე მიიღეს. ადგილობრივები ამბონენ, რომ პროცესი საავტომობილო გზების დეპარტამენტის მხრიდან მუქარის თანხლებით ხორციელდებოდა. მათ ეჭვი აქვთ, რომ მათი კუთვნილი თანხები მითვისებულია. სუფსელების განცხადებით, საქმეზე გამოძიება უკვე დაწყებულია და 1 წელი და 2 თვეა მიმდინარეობს. გამოძიების შედეგები კი მათთვის უცნობია. საპროტესტო აქციის მონაწილეები დახმარებას პრემიერ – მინისტრს სთხოვენ და მოითხოვენ განსახლების სამოქმედო გეგმა გასაჯაროვდეს, პროკურატურამ გამოძიების დასკვნა გამოგზავნოს და თანხები შესაბამისად ანაზღაურდეს.