მიქანაძის თქმით, სკოლებში სავალდებულო მე-12 კლასი 2027 წლიდან გაუქმდება

განათლების მინისტრის, გივი მიქანაძის თქმით, სკოლებში საშუალო საფეხური 2027-2028 სასწავლო წლიდან X-XI კლასები იქნება.

მისივე ცნობით, 2027 წლიდან მე-11 კლასში იქნება “სკოლაში ორგანიზებული რეპეტიტორიუმი”.

“ზოგადი განათლების საფეხური: მივიღეთ გადაწყვეტილება, რომ პირველ კლასელთა ასაკი განისაზღვროს 6 წლით. ბავშვის 1-ელ კლასში დარეგისტრირება შესაძლებელი იქნება მხოლოდ იმ შემთხვევაში, თუ მას 15 სექტემბრის ჩათვლით უსრულდება 6 წელი. ცვლილებები ამოქმედდება 2026 -2027 სასწავლო წლისთვის.

[…] საკანონმდებლო ცვლილებების საფუძველზე ზოგადი განათლების საფეხურები განისაზღვრება შემდეგნაირად: 2026-2027 სასწავლო წლიდან დაწყებითი საფეხური – I-VI კლასები, საბაზო საფეხური – VII-IX კლასები, ხოლო საშუალო საფეხური – X-XI კლასები 2027-2028 წლიდან. ამავე სასწავლო წლიდან, მე-11 კლასში იქნება უზრუნველყოფილი სკოლაში ორგანიზებული რეპეტიტორიუმი, რომელიც მოსწავლეს მისცემს შესაძლებლობას სრულფასოვნად მოემზადოს ეროვნული გამოცდებისთვის” – თქვა მიქანაძემ ბრიფინგზე.

მიქანაძემ აღნიშნა, რომ ეს და სხვა ცვლილებები საკანონმდებლო ინიციატივით წარედგინა პარლამენტს და მომავალ კვირას დაჩქარებული წესით იქნება განხილული.