“მინდა მოგილოცოთ ჩემი დაკავება, როგორც ჩანს, ეს დიდი მიღწევაა”-ბადრი ესებუა

„პირველ რიგში, მინდა მოგილოცოთ ჩემი დაკავება – დიდი მიღწევაა ეს, როგორც ჩანს“, – ამ სიტყვებით მიმართა საქართველოს ბანკზე თავდასხმაში ბრალდებულმა ბადრი ესებუამ სამეგრელო-ზემო სვანეთის პოლიციის დეპარტამენტის ყოფილ უფროსს, ავთანდილ გალდავას ზუგდიდის რაიონული სასამართლოში გამართულ პროცესზე.

შეგახსენებთ, ავთანდილ გალდავა ის პირია, რომელმაც საქართველოს ბანკზე თავდამსხმელს მოთხოვნილი თანხა მიუტანა და მძევლად ჩაბარდა.

ცნობისთვის, შეიარაღებული, ნიღბიანი პირი ზუგდიდში, „საქართველოს ბანკის“ ერთ-ერთ ფილიალში 2020 წლის 21 ოქტომბერს შეიჭრა და მძევლად აიყვანა 43 ადამიანი. მოგვიანებით ცნობილი გახდა, რომ თავდამსხმელი ბადრი ესებუაა და 500 ათას დოლარს და უსაფრთხოდ გადაადგილებას მოითხოვს.

სამართალდამცველთან მოლაპარაკების შედეგად, მოთხოვნებზე თანხმობის მიღების შემდეგ, ესებუამ მძევლების უმრავლესობა გაათავისუფლა და სამ მძევალსა და სამეგრელო-ზემო სვანეთის პოლიციის დეპარტამენტის დირექტორთან ერთად დატოვა ბანკის შენობა. ვრცელდებოდა ცნობები, რომ ის, სავარაუდოდ, ოკუპირებულ აფხაზეთში გადავიდა.

ბადრი ესებუა სამართალდამცველებმა 8 თებერვალს გამთენიისას დააკავეს. მას 15 წლამდე პატიმრობა ემუქრება. 

დაკავებული ბრალს არ აღიარებს.