მთავრობამ სსიპებს და სხვა სახელმწიფო უწყებებს შტატგარეშე თანამშრომელთა მაქსიმალური რაოდენობა განუსაზღვრა

მთავრობამ სსიპ-ებს და სხვა სახელმწიფო უწყებებს შტატგარეშე თანამშრომელთა მაქსიმალური რაოდენობა განუსაზღვრა. შესაბამისი განკარგულებები ბოლო ორი კვირის განმავლობაში მთავრობის ადმინისტრაციის ვებგვერდზეა გამოქვეყნებული. ირაკლი კობახიძის მიერ ხელმოწერილი განკარგულებების თანახმად, საუბარია 2026 წლის განმავლობაში შტატგარეშე თანამშრომელთა დასაქმებაზე, რომელთა მაქსიმალური რაოდენობები შემდეგნაირად განისაზღვრა:

1. ეკონომიკის სამინისტროს ცენტრალური აპარატი – 56
2. ჯანდაცვის სამინისტრო – 205 (ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სფეროში პოლიტიკის შემუშავებისა და მართვის პროგრამის ფარგლებში), 9 (სამინისტროს სისტემაში შემავალ სამედიცინო და სხვა დაწესებულებათა რეაბილიტაციისა და აღჭურვის პროგრამა)
3. თავდაცვის სამინისტროსა და მის სსიპ-ებში – 3412
4. სსიპ მუნიციპალური განვითარების ფონდი – 210
5. სსიპ სოციალური მომსახურების სააგენტოს – 263 (სააგენტოს აპარატში); 476 (სოციალურად დაუცველი ოჯახების ფულადი დახმარების ქვეპროგრამის ფარგლებში) და 1 (საგრანტო პროექტის – “საქართველოში სიღარიბის დაძლევის მხარდაჭერა Ultra Poor Graduation გზით“ ფარგლებში)
6. სსიპ ლევან სამხარაულის სახელობის სასამართლო ექსპერტიზის ეროვნული ბიურო – 310
7. სსიპ საქართველოს კონკურენციისა და მომხარებლის დაცვის სააგენტო – 10
8. სსიპ საქართველოს ინტელექტუალური საკუთრების ეროვნული ცენტრი – 39
9. სსიპ ფინანსთა სამინისტროს აკადემია – 68
10. სსიპ საფინანსო-ანალიტიკური სამსახური – 45
11. სსიპ საგანგებო სიტუაციების კოორდინაციისა და გადაუდებელი დახმარების ცენტრი – 90 (საგანგებო სიტუაციების კოორდინაციისა და გადაუდებელი დახმარების მართვის პროგრამის ფარგლებში) და 5718 (პირველადი და გადაუდებელი სამედიცინო დახმარების უზრუნველყოფის ქვეპროგრამის ფარგლებში).
12. ააიპ საქართველოს სამედიცინო ჰოლდინგი – “სოფლის ექიმი – პირველადი ჯანდაცვის მომსახურება სოფლად” – 2908
13. სსიპ შრომის ინსპექციის სამსახური – 22
14. სსიპ სამედიცინო და ფარმაცევტული საქმიანობის რეგულირების სააგენტო – 300 (მათ შორის, 20 ერთეულით – სახელმწიფო ბიუჯეტის ფარგლებში, ხოლო 280 ერთეულით – საქართველოს კანონმდებლობით ნებადართული სხვა შემოსავლების – საკუთარი სახსრების ფარგლებში)
15. სსიპ დევნილთა, ეკომიგრანტთა და საარსებო წყაროებით უზრუნველყოფის სააგენტო – 23 (დევნილთა, ეკომიგრანტთა და საარსებო წყაროებით უზრუნველყოფის პროგრამის ფარგლებში), 4 (სარეინტეგრაციო დახმარება საქართველოში დაბრუნებული მიგრანტებისთვის პროგრამის ფარგლებში), 15 (იძულებით გადაადგილებულ პირთა განსახლების სოციალური და საცხოვრებელი პირობების შექმნის პროგრამის ფარგლებში), 4 (საერთაშორისო დაცვის მქონე პირთა ინტეგრაციის ხელშეწყობის პროგრამის ფარგლებში)
16. სსიპ საქართველოს მეცნიერებათა ეროვნული აკადემია – 39
17. სსიპ სახელმწიფო გრანტის მართვის სააგენტო – 6
18. ააიპ ცენტრალური სისხლის დაწესებულება – 30
19. საკონსტიტუციო სასამართლო – 35
20. საქართველოს პროკურატურა – 168
21. უზენაესი სასამართლო – 88

ცნობისთვის, საკანონმდებლო ჩანაწერების თანახმად, თუ საჯარო დაწესებულებაში 30 დღეზე მეტი ვადით გაფორმებული შრომითი ხელშეკრულებით დასაქმებულ პირთა რიცხოვნობა შტატით გათვალისწინებულ თანამდებობებზე ფაქტობრივად დასაქმებულ თანამშრომელთა რიცხოვნობის 1%-ს აღემატება და 5 ერთეულზე მეტია, არამუდმივი ამოცანების შესასრულებლად შრომითი ხელშეკრულებით დასაქმებულ პირთა რიცხოვნობა უნდა შეთანხმდეს საქართველოს მთავრობასთან. სწორედ აღნიშნულის გამო გახდა საჭირო უწყებებისთვის მთავრობის თანხმობა. განსაზღვრული რაოდენობები არის ის მაქსიმალური ზღვარი, რამდენი შტატგარეშე თანამშრომლის დასაქმებაც მათ შეუძლიათ წლის განმავლობაში.

www.bm.ge