„მთავარი არხი“ : ვანო ჯავახიშვილს ილო ბეროშვილით ჩაანაცვლებს

ვანო ჯავახიშვილის გუნდსა და „მთავარი არხის“ მენეჯმენტს შორის დაპირისპირება გრძელდება. ისინი საჯარო განცხადებებით ეპასუხებიან ერთმანეთს და მიაჩნიათ, რომ მეორე მხარემ უკადრებელი იკადრა. მთავარმა არხმა გავრცელებულ საპასუხო განცხადებაში დაწერა, რომ ჯავახიშვილის შემცვლელი უკვე ნაპოვნია და იგივე დროს, იგივე არხზე იუმორისტულ შოუს გაუძღვება. მათ არ დაუკონკრეტებიათ, ვინ იქნებოდა ვანოს შემცვლელი, თუმცა, ამჯერად უკვე ვრცელდება, რომ „მთავარი არხი“ ვანო ჯავახიშვილს ილო ბეროშვილით ჩაანაცვლებს. ამ ინფორმაციას კულუარებში უკვე ადასტურებენ. რა სახელწოდება ექნება იუმორისტულ შოუს ჯერ უცნობია და ტელეკომპანია დეტალებს არ აკონკრეტებს, თუმცა ხაზგასმით ითქვა, რომ არხს სურს ნაკლები პოლიტიკური იუმორი იყოს მასში წარმოდგენილი. ილო ბეროშვილს ამ ფორმატის იუმორისტული გადაცემა რამდენიმე წლის განმავლობაში ტელეკომპანია „იმედის“ ეთერში უკვე მიჰყავდა.

სულ რამდენიმე დღეში მთავარი არხიცა და ტვ პირველიც პარასკევობით 22 საათზე იუმორისტული გადაცემის ახალ სეზონს დაიწყებს და ორივე არხის დეტალები გაირკვევა.

ნიკა გვარამია ამ დაპირისპირებაში ცხადია თავისსავე არხს მიემხრო და ციხიდან გავრცელებული განცხადებით მხარი მთავარი არხის გუნდს დაუჭირა, მაყურებელს კი მოუწოდა, ახალ გადაცემას დაელოდონ იგივე დღეს და ახალ წამყვანს უგულშემატკივრონ. ამით მან ირიბად გააკრიტიკა ვანოს გუნდი და არაფერი უთქვამს მათ საქებრად. თამუნა ლეკვეიშვილმაც დაწერა, რომ სამწუხაროა მისი კოლეგების რეაქციები.

ნაციონალური მოძრაობის ლიდერმა ნიკა მელიამ კი გაავრცელა განცხადება და აღნიშნა, რომ ვანოს შოუს გუნდის გვერდით გაწევა უსამართლობაა და მათი წვლილი არ უნდა დაივიწყონ.

ნოდარ მელაძემ დაწერა, რომ თუ მთავარი არხის რეიტინგს ვანოს შოუს იუმორისტული გუნდი აშენებდა, „ეტყობა ამ დროს ჩვენ მატყლს ვჩეჩავდით“-ო. ინგა გრიგოლიამაც დაწერა, რომ ვანოს შოუს ეთერის გარეშე დატოვება წარმოუდგენელი იქნებოდა, ამდენად მთავარ არხს არ უნდა გაკვირვებოდა, რომ თავის გადასარჩენად გუნდმა ეს გადაწყვეტილება მიიღო.

თავად ვანო ჯავახიშვილი ამბობს, რომ თუ მთავარზე დარჩებოდა, იქ მხოლოდ ვანოს შოუ შენოარჩუნდებოდა, სხვა გადაცემები და გუნდის დანარჩენი წევრები კი უსამსახუროდ დარჩებოდნენ. ამდენად, მათი გადაწყვეტილებით, არჩიეს ტვ პირველის შემოთავაზება მიეღოთ და სრული გუნდი ერთიანობის შესანარჩუნებლად ტვ პირველზე გადასულიყო.