“მზად ვართ, ჭიათურის მაღაროები მაღაროელებს მართვაში გადავცეთ” – ჯორჯიან მანგანეზის განცხადება

კომპანია “ჯორჯიან მანგანეზი” მორიგ განცხადებას ავრცელებს და ამბობს, რომ მზადაა თანამშრომელთა პასუხისმგებლობის გათავისებისა და სრული კონსესუსის შემთხვევაში, ჭიათურის მაღაროები მაღაროელებს მართვაში გადასცეს.

განცხადებას უცვლელად გთავაზობთ:

“ჯორჯიან მანგანეზის არაერთი მცდელობისა და შეთავაზების მიუხედავად, რომ დასაქმებულებსა და დამსაქმებელს შორის შეთანხმება შემდგარიყო, თანამშრომელთა ნაწილმა პროტესტის რადიკალურ ფორმას მიმართა.

კომპანიისთვის თანამშრომლების ჯანმრთელობის დაცვა და მათი უსაფრთხოება ჩვენი მთავარი ღირებულებაა. ზემოთაღნიშნულიდან გამომდინარე, კომპანია ეხმაურება მიმდინარე აქციებზე არაერთგზის გაჟღერებულ მოთხოვნას, რომ ჭიათურის მაღაროები მაღაროელებს გადაეცეთ.

​ჩვენი მიზანია, შექმნილი კრიზისული სიტუაცია დროულად მოგვარდეს, შეწყდეს პროტესტის რადიკალური ფორმა, თანამშრომლები სამუშაო პროცესს დაუბრუნდნენ, აღდგეს ქალაქის ყოველდღიური ცხოვრების რიტმი. ამისათვის კომპანია მზად არის, თანამშრომელთა პასუხისმგებლობის გათავისებისა და სრული კონსესუსის შემთხვევაში, ჭიათურის მაღაროები მაღაროელებს მართვაში გადასცეს.”

ცნობისთვის, ჭიათურელი მაღაროელები ორ კვირაზე მეტია გაფიცულები არიან. მათი ნაწილი შიმშილობს. პროტესტის მონაწილეებმა თვითდაზიანებებიც მიიყენეს. გაფიცულების ნაწილი თბილისში ჩამოვიდა და პროტესტს პარლამენტის შენობასთან აგრძელებს.