მეუფე საბა: უპასუხისმგებლოა სასულიერო პირთა მოწოდება, რომ ტაძარში არმისვლა ქრისტეს ღალატია

“მე როგორც საქართველოს წმინდა სინოდის წევრი პასუხისმგებლობას არ გავურბივარ და ნურავინ ხელებს ნუ დავიბანთ” – ასე გამოეხმაურა ჩრდილოეთ ეპარქიის ეპისკოპოსი, საბა ინწკირველი საქართველოს მთავრობისა და საპატრიარქოს ერთობლივ გადაწყვეტილებას, რომლის მიხედვით, აღდგომის ღამეს მოქალაქეები ლიტურგიას დაესწებიან, ხელისუფლება კი ტაძრებში დისტანცირებას უზრუნველყოფს. 

“პასუხიმგებლობა არის ჩვენზე და ჩვენს გადაწყვეტილებაზე, რაზეც შევთანხმდით სახელმწიფოსთან. იმის ვაჟკაცობა გვეყოს, რომ მრევლს არ გადავაბრალოთ, იმიტომ, რომ ჩვენ რასაც ვეტყვით, ის უნდა გააკეთოს მრევლმა. ამიტომ როცა ჩვენ მრევლს არჩევანის წინაშე ვაყენებთ, ჩვენ არ ვიცით, შედეგები რა იქნება. აღდგომას ძალიან ბევრი ადამიანი მოდის ეკლესიაში”- თქვა მეუფე საბამ ტვ პირველის ეთერში და აღნიშნა, რომ სასულიერო პირების მოწოდებები, რომ ქრისტიანობა ვაჟკაცობაა და ეკლესიაში არმისვლა ქრისტესა და რწმენის ღალატია, არის უპასუხისმგებლობა და უპატივცემულობა.

“გაეცათ თუ არა პასუხი, მათ ვინც ამბობს, რომ 100 000 მოწამის ერი ვართ ჩვენ და ახლა ჩნდება ვუღალატებთ ეკლესიას თუ არა?! ამ ადამიანებს სიტყვებს თუ გავეცით პასუხი და ხალხს თუ ვეუბნებით, რომ ეს ასე არაა, დღეს არავინ თქვენ არ გართმევთ სარწმუნოებას, ქრისტეს სიყვარულს. არამედ დღეს ჩვენ ვებრძვით ვირუსს და ამ ვირუსთან ბრძოლის მეთოდებს გვეუბნებიან ჯანდაცვის წარმომადგენლები და ჩვენ უნდა გავითვალისწინოთ. ამიტომ, როდესაც დადგა ეს საკითხი და გაავრცელეს, რომ თითქოს დღეს მართლმადიდებლობის დევნა იწყება, მრევლმა ეს სხვანაირად აღიქვა და ვიტყვი, რომ ასეთი განცხადებები არის უპატივცემულო და უპასუხისმგებლო განცხადებები, პირველ რიგში მრევლის მიმართ” – თქვა მეუფე საბამ 

ეპისკოპოსი ამბობს, რომ ჩვენი თითოეული ნაბიჯი და სიტყვა უნდა ემსახურებოდეს, ვირუსის საფრთხის აცილებას. მან ხალხს სახლში დარჩენისკენ მოუწოდა. 

კომენდანტის საათი და მისი დარღვევისთვის გათვალისწინებული ჯარიმა ძალაში რჩება. შესაბამისად, მრევლი ტაძრებში თავს საღამოს 21:00 საათიდან დილის 06:00-საათამდე უნდა დარჩნენ.

გარდა ამისა, 17 აპრილიდან 10 დღის განმავლობაში მოქალაქეებს სასაფლაოზე გასვლა ეკრძალებათ.

პარალელურად ექიმები ამბობენ, რომ ჯანდაცვის სისტემა პაციენტების დიდ ნაკადს ვერ გაუძლებს და მოსახლეობას სახლში დარჩენას სთხოვენ.