მეუფე გრიგოლი – მძიმე სურათია და ალბათ, ჭყონდიდელ მიტროპოლიტსაც არ მოსწონს რაც ხდება

მძიმე სურათია და ვფიქრობ, რომ ალბათ, თვით ჭყონდიდელ მიტროპოლიტსაც არ მოსწონს რაც ხდება, თუმცა ის გამოსავალს იმ გადაწყვეტილებებში ხედავს, რომელსაც ღებულობს, – ასე ეხმაურება ფოთსა და ხობის მიტროპოლიტი მეუფე გრიგოლი ჭყონდიდის ეპარქიაში განვითარებულ მოვლენებს.

მისი თქმით, ბევრ ეპარქიაში იყო პრობლემები, თუმცა მისთვის გაურკვეველი , რატომ გამწვავდა პრობლემა ჭყონდიდის ეპარქიაში.

,,ერთი სიტყვით, მძიმე სურათი არის და ვფიქრობ, რომ ალბათ თვით ჭყონდიდელ მიტროპოლიტსაც არ მოსწონს რაც ხდება. თუმცა, ის გამოსავალს იმ გადაწყვეტილებებში ხედავს, რომელსაც ღებულობს. საერთოდ უნდა გითხრათ, ეკლესიის წიაღში, მღვდელმთავრებშიც, სხვადასხვა საკითხებზე არსებობს განსხვავებული აზრები, მაგრამ ჩვენ ამაზე საჯაროდ არ ვსაუბრობთ და სხვა სივრცეში განვიხილავთ. ისე უნდა გითხრათ, რომ ეკლესია რამდენადაც ცოცხალი ორგანიზმია, პრობლემები უცხო არ არის. ჩვენც გვაქვს გავლილი, არა ზუსტად მსგავსი, მაგრამ ზოგადად სერიოზული პრობლემები გვქონდა ჩვენც და დიდი ხანი არის გასული , 25 წელია გასული. იგივე ახალციხეშიც შეიქმნა პრობლემები, ესეც დიდი ხანია უკვე. ყველგან არის ეს, მაგრამ ჩვენ ჭყონდიდში ვხედავთ ამ პრობლემას რამდენადაც ის გამწვავდა, რატომ გამწვავდა ამას ვერ გეტყვით. ერთი რამ შემიძლია ვთქვა, მეც იმდენივე ვიცი, რაც ზოგადად თქვენ, ტელევიზიებიდან მესმის“, – აცხადებს მეუფე გრიგოლი.

მეუფე გრიგოლი ამბობს, რომ ის რომ ყოფილიყო იმ ადამიანებს შორის ვინც ჭყონდიდის ეპარქიაში არსებულ საკითხებზე მსჯელობდნენ , მისი რჩევა განსხვავებული იქნებოდა.

,,მე რომ ვყოფილიყავი იმ ადამიანებში, ვინც ამ საკითხზე მსჯელობდნენ, ჩემი რჩევა რა თქმა უნდა, განსხვავებული იქნებოდა. მე რა თქმა უნდა, არც მას და არც საკუთარ თავს ვაკადრებ, რომ აქედან რჩევა ვუთხრა. უბრალოდ უნდა გითხრათ, ვიცით, რომ წმინდა წერილი ერთია, ბიბლია ერთია, მაგრამ ადამიანები სხვადასხვანაირად კითხულობენ და შესაბამისად განსხვავებული მიდგომები აქვთ. ასევე ხდება კანონებშიც, სამოქალაქო ცხოვრებაში, არა მარტო სამოქალაქო ცხოვრებაში და ყველა ადამიანს აქვს თავისი ხელწერა. მეუფე სტეფანე ფიქრობს, რომ ამითი პრობლემას გადაჭრის. პატრიარქი ხშირად ამბობს ხოლმე, უთქვამს ჩვენთვის, რომ თქვენ მღვდელმთავრები უნდა ფიქრობდეთ, რომ ისტორიული პოროვნებები ხართ, ეს ნიშნავს იმას, რომ ჩვენი მოქმედება არამარტო დღეს, არამედ ისტორიულ ჭრილშიც იქნება შეფასებული და ძალიან დიდი სიფრთხილე და გონიერება გვმართებს”, – განაცხადა მეუფე გრიგოლმა.