19 წლის გოგონა, რომელმაც სამშობლოს თავისუფლებას საკუთარი სიცოცხლე შესწირა – ეს მარო მაყაშვილია. იდეისთვის მებრძოლი ახალგაზრდა ქალი ასი წლის წინანდელი საქართველოდან.
ცხინვალის დრამატულმა თეატრმა სცენაზე მარო მაყაშვილის დღიურები გააცოცხლა და 1918-21 წლების დამოუკიდებელი საქართველოს რეალობა და პრობლემატიკა მაყურებლამდე ამგვარად მიიტანა.
სპექტაკლი რეჟისორმა გოჩა კაპანაძემ ლიტერატურული თეატრის პრინციპზე ააგო, მარო მაყაშვილის პერსონაჟი ოთხ მსახიობს გაათამაშებინა და საბოლოოდ, მაყურებელს ძალიან ამაღელვებელი და ამავე დროს ინფორმატიული წარმოდგენა უჩვენა.
სპექტაკლის პრობლემატიკა უცვლელი, კონტექსტი კვლავ თანამედროვე, საშიშროება რუსეთისგან ისევ აქტუალური – როგორც გოჩა კაპანაძემ აღნიშნა, თეატრი მისტიკური დამთხვევების ადგილია. მართლაც, ნამუშევრის პრემიერა 25 თებერვალს, უკრაინაში რუსეთის შეჭრიდან მეორე დღეს შედგა.
სპექტაკლის ჩვენება ოზურგეთის დრამატულ თეატრში საქართველოს კულტურის სპორტისა და ახალგაზრდობის საქმეთა სამინისტროს მხარდაჭერით განხორციელდა.
Loading ...