მამუკა ონაშვილს მახათას მთაზე, ახალ პანთეონში დღეს დაკრძალავენ

მომღერალ მამუკა ონაშვილს მახათას მთაზე, ახალ პანთეონში დაკრძალავენ. ამის შესახებ ინფორმაციას მისი მეგობარი ბესო ჩუბინიძე ავრცელებს.

მისივე თქმით, ონაშვილის ცხედარი სიონის საკათედრო ტაძარში იყო დასვენებული, სადაც 2 და 3 აგვისტოს სამოქალაქო პანაშვიდი მიმდინარეობდა.

„დაკრძალვა იქნება ხუთშაბათს, 4 აგვისტოს. გამოსვენება მოხდება 14:00 საათზე, სიონის საკათედრო ტაძრიდან. მამუკას დავკრძალავთ მახათას მთაზე, ახალ პანთეონში, ტაძართან ახლოს“, – განაცხადა ბესო ჩუბინიძემ.

შეგახსენებთ, რომ მომღერალი მამუკა ონაშვილი 55 წლის ასაკში გარდაიცვალა. ის 30 ივლისს, ნატახტართან ავარიაში მოყვა.