თუ “ქართული ოცნების” მხრიდან რაიმე გადაწყვეტილება ვერ შესრულდა, ეს არის ხალხის განსასჯელი. “ნაციონალურმა მოძრაობამ” საზოგადოების სახელით საუბარს თავი დაანებოს, – ამის შესახებ საპარლამენტო უმრავლესობის ლიდერმა მამუკა მდინარაძემ ჟურნალისტებს განუცხადა, რითაც გამოეხმაურა პარლამენტთან გამართულ საპროტესტო აქციას. მისივე თქმით, საზოგადოება თავის სიტყვას არჩევნებზე იტყვის.
როგორც მდინარაძემ აღნიშნა, “ქართულ ოცნებას” “ნაციონალური მოძრაობის” წინაშე პასუხი არაფერზე აქვს გასაცემი.
“რატომღაც გვეუბნებიან, რომ “ნაციონალურ მოძრაობას” და მის სატელიტებს რაღაც პასუხი უნდა გავცეთ. ჩვენ მათ კი არ უნდა გავცეთ პასუხი, არამედ პასუხი უნდა გავცეთ ხალხს. თუ “ქართული ოცნების” მხრიდან რაიმე გადაწყვეტილება ვერ შესრულდა, ეს არის ხალხის განსასჯელი. ხალხი ამას განსჯის არჩევნებზე. თუკი ეს გადაწყვეტილება მტკივნეულად მიიღო საზოგადოებამ და საზოგადოების ინტერესი შეილახა, ხალხი არჩევნებზე გასცემს ამაზე პასუხს. “ნაციონალური მოძრაობის” წინაშე პასუხის გასაცემი ნამდვილად არ გვაქვს არაფერი. ხალხის სახელით ისინი ნუ ლაპარაკობენ. საზოგადოება თავის სიტყვას ამბობს დემოკრატიულ არჩევნებზე, რომელიც ბოლო წლების განმავლობაში განსაკუთრებულად არის უზრუნველყოფილი საქართველოში. ამიტომ თავი დაანებობ საზოგადოების სახელით ლაპარაკს. საზოგადოება თავის სიტყვას თვითონ იტყვის”, – განაცხადა მდინარაძემ.
www.interpressnews.ge
Loading ...
