მათემატიკა, როგორც წესი, კლასში ბავშვების უმეტესობას უჭირს. ჩვენს ვებ-გვერდზე ჩატარებულ გამოკითხვაში მშობლებს მათემატიკა არაერთხელ დაუსახელებიათ ბავშვისთვის ყველაზე რთულ და ძნელად აღსაქმელ საგნად. ხშირად ასეთ ბავშვებზე ამბობენ, რომ მათემატიკური უნარები არ აკლიათ, “ჰუმანიტარები” არიან, ნიჭი არ აქვთ და ა.შ. სპეციალისტები გვირჩევენ, დასკვნები ასე მარტივად არ გამოვიტანოთ.
დისკალკულია ბავშვებში გავრცელებული პრობლემაა, თუმცა მისი ამოცნობა და გამოსწორება ადრეულ ეტაპზევეა შესაძლებელია. პირველ რიგში, კარგად რომ განვმარტოთ, დისკალკულია არის დარღვევა, როდესაც ბავშვს თვლა და არითმეტიკული მოქმედებების შესრულება არ შეუძლია. ხშირად ბავშვები, რომლებსაც ეს პრობლემა აქვთ, რაოდენობას კარგად ვერ აღიქვამენ. ზუსტი მიზეზი, თუ რა იწვევს ამ დარღვევას ბავშვებში, უცნობია, მაგრამ სპეციალისტები რამდენიმე ფაქტორს მაინც ასახელებენ. ეს შეიძლება იყოს: რთული ორსულობა ან მშობიარობა, თავის ტრავმები, ნეიროინფექციები და გენეტიკურად განსაზღვრული დეფექტები.
დისკალკულიის 6 ტიპი არსებობს:
ვერბალური – როდესაც, ბავშვს ციფრების აღქმა სმენის მეშვეობით უჭირს და მოქმედებებს სიტყვიერად ვერ ასრულებს, ზეპირად ვერ ანგარიშობს, თუმცა წერილობით არითმეტიკაში პრობლემა არ აქვს.
პრაქტიკულ-გნოსტიკური – ბავშვს აბსტრაქტული ცნებების წარმოდგენა და მათი პრაქტიკულ მაგალითებად თარგმნა უჭირს. მაგალითად, თუ ამოცანაის ამოხსნა უწევს, მას მოკლე ჩანაწერის გაკეთება უჭირს.ლექსიკური – ეს არის დისკალკულიის ტიპი, როდესაც ბავშვს მათემატიკური ნიშნებისა და რიცხვების წაკითხვა უჭირს. რა თქმა უნდა, გარკვეულ მომენტამდე ყველას შეიძლება “მეტობისა” და “ნაკლებობის” ნიშანი აერიოს, მაგრამ თუ მესამეკლასელი “გამრავლების” ნაცვლად “გაყოფის” ნიშანს იყენებს, ეს უკვე პრობლემაა.
გრაფიკული – როცა ბავშვს რიცხვების წერასთან დაკავშირებით აქვს სირთულეები, მაგრამ ამავე დროს მათემატიკური მოქმედებების გაგება შეუძლია.
იდიოგნოსტიკური – როდესაც არსებობს სირთულეები ზეპირი გაანგარიშების შესრულებაში. უფრო ზუსტად კი, მოსწავლეს ამოცანის ამოხსნა უჭირს, თუ დაწერილ პირობას ვერ ხედავს და მონაცემებს ზეპირად ეუბნებიან.
ოპერაციული – როდესაც დაქვეითებულია როგორც წერითი, ისე ზეპირი არითმეტიკის უნარები.
Loading ...