ლევან წულაძემ მარჯანიშვილის თეატრის სამხატვრო ხელმძღვანელის თანამდებობა დატოვა

ლევან წულაძემ მარჯანიშვილის თეატრის სამხატვრო ხელმძღვანელის თანამდებობა დატოვა. ინფორმაციას კულტურის სამინისტრო Facebook-ზე აქვეყნებს.

კულტურის სამინისტროს ინფორმაციით, ლევან წულაძემ სამინისტროს თანამდებობიდან გათავისუფლების შესახებ განცხადებით 2 ოქტომბერს მიმართა, მისი თანამდებობიდან გათავისუფლების ბრძანება კი დღეს, 10 ოქტომბერს გამოიცა.

“ლევან წულაძის სამხატვრო ხელმძღვანელის თანამდებობიდან გათავისუფლების ბრძანება დღეს, 10 ოქტომბერს, გამოიცა. 
ლევან წულაძე მოცემულ პოზიციაზე უფლებამოსილების ახალი, ოთხწლიანი ვადით, 2022 წლის 6 მარტიდან დაინიშნა. მან მარჯანიშვილის თეატრს 18 წლის განმავლობაში უხელმძღვანელა და არაერთ მნიშვნელოვან წარმატებას მიაღწია როგორც ქვეყანაში, ასევე – საზღვარგარეთ.
კულტურის სამინისტრო მადლობას უხდის ლევან წულაძეს მრავალწლიანი აქტიური შემოქმედებითი საქმიანობისთვის და კვლავაც დიდ წარმატებებს უსურვებს” – წერია კულტურის სამინისტროს განცხადებაში.