ენერგომატარებლების მაღალი ფასი იყო იმის განმაპირობებელი, რომ საქართველოში საცალო ქსელებში საწვავის ფასი რეკორდულად მაღალი იყო, – ამის შესახებ საქართველოს ვიცე-პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა საქართველოს პირველი არხის გადაცემაში „თავისუფალი ხედვა“ განაცხადა.
„უკრაინის ომი აისახება არა მხოლოდ რეგიონის ეკონომიკებზე, არამედ გლობალურ ეკონომიკაზე. ჩვენ ვხედავთ, რომ დიდი ხნის განმავლობაში ენერგომატარებლები მაღალ ფასს ინარჩუნებს და ზუსტად ეს მაღალი ფასი იყო იმის განმაპირობებელი, რომ საქართველოში საცალო ქსელებში საწვავის ფასი რეკორდულად მაღალი იყო. ალბათ, ისტორიაში ყველაზე მაღალი ფასი დაფიქსირდა“, – განაცხადა დავითაშვილმა.
მისი თქმით, ნავთობმწარმოებელი ქვეყნების გარდა მსოფლიოში არ დარჩენილი ქვეყანა, სადაც საწვავზე ფასის რეკორდულად მაღალი მაჩვენებელი არ დაფიქსირდა.
„საქართველო ამ კუთხით გამონაკლისი არ არის. თუმცა აქ არ არის საწვავის ყველაზე მაღალი ფასი. უკვე იყო სხვადასხვა ექსპერტის მხრიდან განცხადებები, რომ საქართველოში საწვავის ფასი არის ზოგიერთ ქვეყანაზე, ძირითადად ნავთობმწარმოებელ ქვეყნებზე უფრო მაღალი, მაგრამ ასამდე ქვეყანაა, სადაც საქართველოზე მაღალი ფასი დაფიქსირდა. რა თქმა უნდა, ეს დამაიმედებელი არ არის. ჩვენ გვესმის, რომ მოსახლეობის სოციალურ პირობებზე და ეკონომიკაზე ეს მძიმედ აისახება. იმიტომ, რომ ნავთობპროდუქტები ბევრი სხვადასხვა პროდუქტის ფასწარმოქმნაში მონაწილეობს“, – განაცხადა დავითაშვილმა.
როგორც ეკონომიკისა და მდგრადი განვითარების მინისტრმა აღნიშნა, ასეთ დროს რამდენიმე გამოსავალი არსებობს და სახელმწიფომ შეიძლება, რამდენიმე ნაბიჯი გადადგას. მისივე თქმით, საწვავზე ფასის შემცირება მოსალოდნელია ორკვირიან პერსპექტივაში.
„ჩვენ დეტალურად ვაკვირდებით სიტუაციას და გვაქვს მუდმივი დიალოგი და კოორდინაცია კერძო სექტორთან. მე ხვალაც მექნება შეხვედრები. ამ სიტუაციაში მთავარი ის არის, რომ უფრო მძიმე შედეგებს არ უნდა ველოდოთ. რეალურად, ორკვირიან პერსპექტივაში უნდა ველოდოთ ფასის შემცირებას. ბაზარს აქვს მოლოდინი, რომ სიტუაცია დამშვიდებისკენ, დასტაბილურებისკენ უნდა წავიდეს და დაახლოებით, ომამდე მაჩვენებელს უნდა დაუბრუნდეს. ეს არის რამდენიმეთვიანი ფიუჩერსული გარიგების ანალიზი. ჩვენ მოკლევადიან კონტრაქტებსაც ვუყურებთ და არის კონკრეტული კომპანიების მხრიდან უფრო იაფად შეძენილი საწვავი, რომელიც ჩვენი იმედით, მალე უნდა გამოჩნდეს ბაზარზე, რამაც მაღალი ფასების წნეხი უნდა მოხსნას“, – განაცხადა დავითაშვილმა.
გადაცემის წამყვანის შეკითხვაზე, რამდენად შეიძლება, ხელისუფლებამ განიხილოს აქციზის გადასახადის გაუქმების, ან შემცირების საკითხი, რამაც შეიძლება, საწვავის ფასი მნიშვნელოვნად შეამციროს, ლევან დავითაშვილმა განაცხადა, რომ ეკონომიკურ გუნდში ასეთ დროს ყველაფერი განიხილება ხოლმე და არ არის ოფცია, რომელიც ასეთ არაორდინალურ სიტუაციაში არ უნდა იქნას გათვალისწინებული.
„რა თქმა უნდა, ვერ ვიქნებით გულხელდაკრეფილი. აქციზის ფასი ამ შემთხვევაში მნიშვნელოვანი ეფექტის მატარებელი ვერ იქნებოდა. იმიტომ, რომ გვესმის, ფასი რამხელაა – სამ ლარს გადასცდა და ოთხ ლარამდე ავიდა. 30-თეთრიანი აქციზი არ არის ისეთი მნიშვნელოვანი ამ ფასწარმოქმნაში, რომელსაც შეიძლება, განსაკუთრებული ეფექტი ჰქონდეს. ჩვენ ვხედავთ, რომ უფრო მნიშვნელოვანი ეფექტი ექნება უფრო იაფად შეძენილი საწვავის ბაზარზე გამოჩენას. რაც შეეხება გადასახადების გაუქმებას გარკვეული პირობებით, რა თქმა უნდა, ეს არის ერთ-ერთი ოფცია, რომელსაც ზოგიერთი ქვეყანა მიმართავს. მათ შორის, ჩვენთანაც ეს შეიძლება, იყოს გაუქმება, შემცირება, ან გარკვეული მცოცავი, სხვადასხვა ტიპის ჰეჯირებული გადასახადი, მაგრამ ამ შემთხვევაში საქმე გვაქვს ძალიან სათუთ საკითხთან და ეს არის ფისკალური დისციპლინა, რომელიც ამ ქვეყანაში მოწესრიგებულია, გარკვეული რეჟიმი არსებობს და ამის ასე ხელყოფა ძალიან რთულია, რასაც შეიძლება, ჰქონდეს ძალიან ცუდი, გადამდები ეფექტი და იყოს საკმაოდ სახიფათო“, – განაცხადა ლევან დავითაშვილმა.
Loading ...
