ლატვიის მთავრობამ რუსეთთან მოსაზღვრე რეგიონებში საგანგებო მდგომარეობის რეჟიმი გამოაცხადა. ინფორმაცია ქვეყნის ხელისუფლების ვებგვერდზე გავრცელდა.
გავრცელებული ინფორმაციით, ეს რეჟიმი 3 თვე იმოქმედებს. გადაწყვეტილება საზღვარზე არალეგალი მიგრანტების რაოდენობის ზრდის რისკს უკავშირდება, რადგან რუსეთის იმ მოქალაქეების რაოდენობა, რომლებსაც ქვეყნის დატოვება სურთ, მნიშვნელოვნად გაიზარდა.
ამასთან ერთად, ლატვიის საგარეო საქმეთა მინისტრის, ედგარ რინკევიჩის თქმით ლატვია რუსეთის არცერთ მოქალაქეს არ შეიფარებს, ვინც ქვეყნიდან სამხედრო მობილიზაციას გაექცევა.
“უსაფრთხოების საკითხებიდან გამომდინარე, ლატვია არ გასცემს ჰუმანიტარულ ან სხვა ტიპის ვიზებს რუსეთის იმ მოქალაქეებზე, ვინც მობილიზაციისგან თავის აარიდებას ეცდება. ასევე არ შევცვლით 19 სექტემბრიდან შენგენის ვიზის მქონე რუსეთის მოქალაქეებისთვის საზღვრის კვეთაზე დაწესებულ შეზღუდვებს”. – წერს რინკევიჩი.
ვლადიმირ პუტინმა 21 სექტემბერს რუსეთში ნაწილობრივი მობილიზაციის ბრძანება გასცა და დასავლეთი გააფრთხილა, რომ “ბირთვული შანტაჟის” გაგრძელების შემთხვევაში, მოსკოვი მათ მთელი არსენალით უპასუხებს.
“თუ ჩვენი ქვეყნის ტერიტორიულ მთლიანობას საფრთხე დაემუქრება, ჩვენი ხალხის დასაცავად ყველა შესაძლო საშუალებას გამოვიყენებთ – ეს ბლეფი არ არის, რუსეთს თავდასხმაზე საპასუხოდ, დიდი რაოდენობით იარაღი აქვს”. – თქვა პუტინმა.
ასევე, პუტინმა NATO-ს ქვეყნების მაღალჩინოსნები რუსეთის წინააღმდეგ მასობრივი განადგურების, ბირთვული იარაღის გამოყენებასა და დასაშვებობაზე საუბარში დაადანაშაულა.
“მათ, ვინც თავს უფლებას აძლევენ, ასეთი განცხადებები რუსეთის მიმართ გააკეთონ, მსურს შევახსენო, რომ ჩვენს ქვეყანას ასევე აქვს სხვადასხვა გამანადგურებელი საშუალებები, ზოგიერთ კომპონენტში კი – უფრო თანამედროვე, ვიდრე NATO-ს ქვეყნებს”. – ამბობს პუტინი მიმართვაში.
Loading ...
