ლანჩხუთში ქალს მატარებელი დაეჯახა

ლანჩხუთში მატარებელი ქალს დაეჯახა, რომელიც ადგილზე გარდაიცვალა.

როგორც ლანჩხუთის მუნიციპალიტეტის მერის მოადგილემ, ეკატერინე გუჯაბიძემ გვითხრა ქალბატონს მეზობლის საქონელი საბალახოდ დაჰყავდა და მას ამაში ანაზღაურებას უხდიდნენ. ტრადიციულად ქალბატონმა დღესაც წაიყვანა პირუტყვი საძოვარზე. აქვე გვითხრეს ისიც, რომ ქალბატონს სმენის პრობლემა ჰქონდა. დღეს კი ყურის სასმენი აპარატი სახლში დარჩა და როცა ლიანდაგზე გადადიოდა, მატარებლის მემანქანის სიგნალი ვერ გაიგონა. უბედური შემთხვევა ლანჩხუთში, ქალაქის ტერიტორიაზე, 14 საათზე მოხდა. ამ წუთებში 60 წლის ქალბატონის ცხედარი ექსპერტიზაზეა გადაყვანილი.

შსს-ს ინფორმაციით, მომხდარ ფაქტზე გამოძიება 275 – ე მუხლით უკვე დაწყებულია. ,,საქმეზე გამოძიება სისხლის სამართლის კოდექსის 275-ე მუხლის მეოთხე ნაწილით დაიწყო, რაც გულისხმობს რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც ადამიანის სიცოცხლის მოსპობა გამოიწვია.”- აცხადებენ შინაგან საქმეთა სამინისტროს პრესსამსახურში.