”კრიტიკული სიტუაცია გვაქვს, გაუსაძლისია გარეთ ყოფნა”…- რა ხდება ოზურგეთში გოლიაძის ქუჩაზე

ოზურგეთში, გოლიაძის ქუჩის მიმდებარე ტერიტორია ყოველდღიურად ადამიანისთვის ჯანმრთელობისთვის საშიში ტოქსიკური კვამლით ივსება.  ამის გამომწვევი მიზეზი კი გრიბოედოვის ქუჩაზე მდებარე თხილის გადამამუშავებელი ქარხანა შპს ,,გლობალ ექსპორტია”, რომლის უკანა მხარეს ჩაშენებული საკვამური პირდაპირ გოლიაძის ქუჩაზე გადის. დღის ნებისმიერ მონაკვეთში ქარხნიდან გამოსული გამონაბოლქვი და ხშირ შემთხვევაში ნამწვავის ,,წვიმა” საფრთხეს უქმნის მიმდებარე ტერიტორიაზე მცხოვრები მცირეწლოვანი ბავშვების, მოხუცებისა და სხვადასხვა დაავადების მქონე ადამიანის ნორმალურ პირობებში ცხოვრებას.

ადგილობრივი ნ.კ აღნიშნავს: ,,მყავს მცირეწლოვანი შვილიშვილები, თუმცა ხშირად ეზოში გასვლაც აუტანელია. საშინელ სუნს რომ თავი დავანებოთ, ჯანმრთელობისთვისაც არანაკლებ საზიანოა ეს ყველაფერი. ვფიქრობ, აუცილებელია გარკვეული ზომები მიიღონ. როდის შეგვეძლება სახლებიდან მშვიდად გასვლა?!”

აღნიშნულთან დაკავშირებით მოსახლეობა ამბობს, რომ უკვე დაუკავშირდნენ გარემოსდაცვითი ზედამხედველობის დეპარტამენტს, თუმცა ცდამ უშედეგოდ ჩაიარა და დღეს პრობლემა დღემდე გადაუჭრელია.

,,ყველანაირმა ცდამ უშედეგოდ ჩაიარა. კრიტიკული სიტუაციაა, დღეს ისევ სახლში დარჩენას ვამჯობინებთ,რადგან გაუსაძლისია გარეთ ყოფნა და იმის ყურება, თუ როგორ ზიანდება ჩვენი ჯანმრთელობა და თანაც, ეს უკვე დიდი ხანია გრძელდება. როდემდე უნდა ისუნთქოს ეზოში წრეში ბურთის თამაშის დროს პატარა ჯერ კიდევ ჯანმრთელმა ბავშვებმა, სეირნობის დროს მოხუცებმა თხილისა და ნამწვავების ,,სურნელი?”” – აცხადებენ ადგილობრივები და იმედი აქვთ, რომ შესაბამისი ორგანოები იმოქმედებენ დამათი პრობლემის გადაჭრაზე ზრუნვას დაიწყებენ.