„კონუსური ფორმა ქვემოთ უნდა მოაქციოთ და არა – ზემოთ, როგორც უმრავლესობა აკეთებს“ – რჩევა ექსპერტისგან კვერცხის შენახვაზე

„ჩემი რჩევა იქნებოდა, კვერცხის კონუსური ფორმა ქვემოთ მოაქციოთ და არა – პირიქით, როგორც ამას უმრავლესობა აკეთებს. მესმის, რომ კვერცხი ისე გამოიყურება, თითქოს მრგვალი ფორმა ქვემოთ ჯობს მოთავსდეს, მაგრამ ეს ასე არაა“, – ამის შესახებ „რადიო პალიტრას“ გადაცემაში „თქვენი დრო“ FAO-ს პროექტის მენეჯერმა, მიხეილ სოხაძემ ისაუბრა.

სოხაძის განმარტებით, კვერცხის სწორი განლაგებით შენახვა მისთვის საჭირო და სასურველი თვისებების უკეთ და უფრო მეტხანს შენარჩუნებას უწყობს ხელს.

„კვერცხს საჰაერო აპკი აქვს და როდესაც ჩვენ კონუსურ მხარეს ზემოთ ვათავსებთ, დაწოლა სწორედ ამ აპკზე მიდის, ის ნელ-ნელა ბუნებრივ მდებარეობას იძულებით იცვლის და ვიწროვდება. შევიწროვებით კი სხვა პროცესები იწყება. შესაბამისად, სასურველია, კვერცხს ჰაერის მხარე ზემოთ ჰქონდეს, ანუ მისი კონუსისებური ნაწილი ქვემოთ მოვათავსოთ – დახლზე გამოტანილ ყუთებში ასეთი განლაგებით სწორედ ამიტომ დევს“, – განაცხადა FAO-ს ექსპერტმა.