ოზურგეთისა და ჩოხატაურის ,,მედალფას” კლინიკებში უკვე კოვიდინფიცირებულებს მკურნალობენ. ეს გადაწყვეტილება ,,მედალფას,, ქსელმა ქვეყანაში შექმნილი ეპიდსიტუაციიდან გამომდინარე მიიღო. ხსენებულ კლინიკებში პაციენტების მიღება იზოლირებული შესასვლელით მიმდინარეობს და სტაციონარში მიმსვლელ სხვა პაციენტებს ვირუსის გადადების საფრთხე არ შეექმნებათ. როგორც ოზურგეთში, ასევე ჩოხატაურში, კლინიკის დირექტორების განცხადებით ,,კოვიდ 19’’ დაავადებულებს შესაბამისი განყოფილების მედიკოსები უკვე მკურნალობენ. ოზურგეთის კლინიკაში 14 , ხოლო ჩოხატაურში 18 საწოლია გამოყოფილი შესაბამისი განყოფილებისთვის. რაც შეეხება მედპერსონალს, ვინც აღნიშნული მიმართულებით უკვე მუშაობს, მათ სხვა პაციენტებთან შეხება არ ექნებათ და პროტოკოლით დადგენილი წესით ყოველ 72 საათში ერთხელ დაიტესტებიან. მედალფას ჰოსპიტალური ქსელი კოვიდგანყოფილების გახსნას ლანჩხუთის მუნიციპალიტეტშიც გეგმავს. აღნიშნულ კლინიკებში იზოლირებულად სწრაფი ტესტირებები თითქმის ერთი თვეა მიმდინარეობს. ოზურგეთში დამატებით ონლაინ ექიმები მუშაობენ და შესაბამისი კომპიუტერული ტომოგრაფიის კვლევებიც ტარდება.