კახეთში მცირეწლოვანი ბავშვი დაიღუპა. ინფორმაციას შინაგან საქმეთა სამინისტროში ადასტურებენ. გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
მომხდართან დაკავშირებით განცხადება გაავრცელა „ამონაშვილის აკადემიამ“, რომელიც პასუხისმგებლობას მშობელს აკისრებს. საკითხთან დაკავშირებით ოჯახის პოზიცია უცნობია. როგორც ირკვევა, ოჯახი კონფერენციაზე უცხოეთიდან იყო ჩასული.
განცხადებაში ნათქვამია, რომ „მზიანეთის საგანმანათლებლო ცენტრში“ გასულ შაბათ-კვირას პედაგოგიკის საერთაშორისო კონფერენცია ტარდებოდა, რომელშიც მონაწილეობდნენ – პედაგოგები, ფსიქოლოგები და სკოლების ხელმძღვანელები სხვადასხვა ქვეყნიდან. განცხადების მიხედვით, კონფერენცია არ იყო ამონაშვილის აკადემიის მიერ ორგანიზებული:
მათი თქმით, ცენტრის „გაფრთხილების მიუხედავად“, კონფერენციის ერთ-ერთი მონაწილე უცხოეთიდან მცირეწლოვან შვილთან ერთად ჩავიდა:
„მშობელმა იცოდა, რომ ორგანიზაცია ბავშვზე პასუხისმგებლობას ვერ აიღებდა. მშობლის უყურადღებობის გამო, კონფერენციის მსვლელობის დროს ბავშვი უმეთვალყურეოდ დარჩა და ჩავარდა სასტუმროს ტერიტორიაზე არსებულ წყალსაცავში. ცენტრის ყველა თანამშრომელმა გააკეთა ყველაფერი, რაც კი შესაძლებელი იყო ბავშვის გადასარჩენად, მაგრამ, სამწუხაროდ, ბავშვი გარდაიცვალა. კონფერენციამ მუშაობა შეწყვიტა. კონფერენციის ყველა მონაწილე ღრმა მწუხარებას გამოთქვამს მომხდარის გამო. გვინდა, ხაზგასმით აღვნიშნოთ, რომ კონფერენცია არ იყო ამონაშვილის აკადემიის მიერ ორგანიზებული. ჩვენი რამდენიმე თანამშრომელი კონფერენციას ესწრებოდა, თუმცა სხვა კავშირი ორგანიზაციას ამ ღონისძიებასთან არ ჰქონია. გთხოვთ, გაგებით შეხვდეთ ჩვენი ოჯახის თითოეული წევრის მდგომარეობას“, – წერია განცხადებაში.
წყარო: პუბლიკა
Loading ...